Pas mbërritjes së rezultatit të analizave të kryera në një laborator të specializuar në Itali, se mostrat e marra nga 2800 tonët e mbetjeve industriale të kompanisë Kurum të depozituara këtu në Porto Romano të Durrësit janë të rrezikshme për shëndetin e njeriut dhe mjedisin, banorët e zonave përreth shprehen të shqetësuar për bashkëjetesën e rrezikshme me mbetjet, prej 15 muajsh.
Thank you for reading this post, don't forget to subscribe!Sipas analizave, mbetjet industriale kanë toksicitet të theksuar dhe pasoja afatgjata, veçanërisht për ekosistemet ujore. Megjithëse hetimet kanë identifikuar përgjegjësi penale, mbetet ende e paqartë se kush do të marrë përsipër asgjësimin e mbetjeve të rrezikshme dhe ku do të asgjesohen.
Dosja “Kurum”/ Dhjetëra mijëra ton mbetje u zhdukën pa gjurmë në Elbasan
Prej rreth 15 muajsh, 2800 ton mbetje të rrezikshme vijojnë të qëndrojnë të depozituara në Porto Romano, ndërsa publikimi i analizave që i klasifikojnë ato si potencialisht kancerogjene ka ngritur alarmin tek banorët dhe ekspertët.
Ndërkohë, në dosjen hetimore ngrihen dyshime edhe për zhdukjen e sasive të tjera me mbetje të dyshimta në zonën e Elbasanit, duke shtuar indiciet për një skemë më të gjerë të menaxhimit të paligjshëm të mbetjeve industriale.
Policia e Durrësit njofton se deri më tani janë ekzekutuar 20 nga 33 masa sigurie, në kuadër të hetimeve për mbetjet e rrezikshme të kompanisë Kurum, të cilat u kthyen në Shqipëri në vjeshtën e vitit 2024 nga Singapori, ndërsa kishin si destinacion Tajlandën.
Hetimet vijojnë për zbardhjen e plotë të përgjegjësive penale, ndërsa fati i 2800 tonëve mbetje të rrezikshme që ndodhen ende në Porto Romano mbetet pa zgjidhje.
