Kryeministri i Kosovës, Albin Kurti ka përshëndetur operacionin e forcave amerikane në Venezuelë për arrestimin e Nicolas Maduros. Në mesazhin që ka publikuar në rrjetet sociale, Kurti thotë se “mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie”, ndërsa kërkon më shumë vëmëndje për rajonin tonë ku “aktorë të caktuar” kërkojnë provokimin e situatës nëpërmjet veprimeve kriminale dhe terroriste. Kurti është i pari lider i vendeve të rajonit që përshëndet ndërhyrjen e SHBA në Venezuelë.
Mesazhi i plotë i Albin Kurtit
Republika e Kosovës mbështet operacionin anti-narkotik të Shteteve të Bashkuara të Amerikës, të udhëhequr nga Presidenti Donald Trump, në Venezuelë. Mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie.
Kosova, si aleate strategjike e ShBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër cenimit të vlerave demokratike perëndimore nga aktorë përfaqësues (proxy) të kundërshtarëve të këtyre vlerave, si në rajonin tonë ashtu edhe më gjerë.
Në këtë kontekst, ritheksojmë nevojën për rritjen e vëmendjes ndaj aktorëve të caktuar rajonalë, të cilët në vazhdimësi synojnë provokimin e situatës së sigurisë përmes veprimeve hibride, kriminale, terroriste dhe ushtarake.
