Carlo Ancelotti është gjithnjë e më pranë marrëveshjes me Brazilin për t’u bërë trajneri i ri i Seleçaos: aventura e trajnerit italian në Madrid është drejt fundit dhe për fundjavën thuhet se emisaret e Federatës braziliane kanë udhëtuar në Spanjë për të rënë dakord për marrëveshjen, në pritje të vendimit përfundimtar dhe hapave të ardhshëm të Real Madrid.
Pas sezoneve të suksesshme dhe festave të paharrueshme, është drejt përfundimit epoka e dytë e Ancelottit te Reali, por mund të hapet një kapitull i ri edhe më intrigues dhe emocionues.
Detajet e kontratës dhe kur do të bëhet nënshkrimi
Sipas asaj që raportoi Sky Sports News në orët e fundit, bisedimet midis Ancelottit dhe CBF-së (Confederação Brasileira de Futebol) do të vazhdojnë në maj dhe trajneri italian pritet të largohet nga Real Madridi përpara Kupës së Botës për Klube në SHBA.
Federata braziliane është shumë e sigurt që do të marrë miratimin për Carlo Ancelottin si përzgjedhësin e ri, dhe emisaret e Seleçaos ndodhen në Spanjë prej disa ditësh për të rënë dakord për marrëveshjen, në pritje të vendimit dhe hapave të ardhshëm të Realit me Ancelottin. Ka shumë gjasa që Carletto të shpallet trajner para Kupës së Botës për Klube: oferta që i është bërë trajnerit nga Reggiolo thuhet të jetë një kontratë deri në Kupën e Botës 2030.
Ancelotti një dëshirë e vjetër e Rodrigues
Presidenti i Federatës së futbollit brazilian, Ednaldo Rodrigues, që prej dorëheqjes së Tite pas Kupës së Botës 2022, ka dashur italianin Ancelotti dhe, pas shkarkimit të Dorival Júnior pas humbjes së rëndë ndaj Argjentinës, është rikthyer të insistojë. Emri tjetër i marrë në konsideratë është ai i Jorge Jesus, aktualisht te Al-Hilal, por trajneri italian ka qenë gjithmonë në krye të listës së drejtuesve të CBF-së.
Objektivi i Rodrigues është të emërojë trajnerin e ri të Brazilit në javët e ardhshme, në prag të thirrjeve për kualifikueset e Kupës së Botës në qershor. Ancelotti ka ende një kontratë aktive dhe kjo mund të paraqesë një problem, por nëse Real Madridi i komunikon trajnerit dëshirën për të ndryshuar në pankinë, atëherë gjithçka mund të ndryshojë në një kohë shumë të shkurtër.
