Kryedemokrati Sali Berisha, në një konferencë për shtyp me gazetarët, u pyet nëse ka nisur lobimin në Shtetet e Bashkuara të Amerikës për heqjen e masës “non grata” ndaj tij.
Berisha deklaroi shkurt se po pret përurimin e administratës së presidentit Trump për të nisur përpjekjet.
“Siç kam theksuar, i gjithë problemi im, dhe vendimi im për moslobim lidhej me ata që kryen grushtin e shtetit ndaj opozitës shqiptare. Me përpjekjen antidemokratike për të kontrolluar opozitën, kontrolluar kryetarin e saj, për ta shndërruar opozitën në një vegël të Edi Ramës.
Tani që ata dorëzojnë pushtetin, unë prej dorëzimin e pushtetit nga ana e tyre, që unë të filloj përpjekjet e mia për të paraqitur këtë akt që do të ngelet, në historinë e demokracisë, si një njollë e zezë për ata që e vendosën.
Pra nuk ka asnjë sekret që ne do të bëjmë të gjitha përpjekjet tona, por natyrisht duhet që administrata e presidentit Donald Trump të inaugurohet dhe të nisë punën në të gjitha institucionet.”– tha Berisha.
