E pabesueshme, Abel Nunez humb jetën nga një goditje topi në kokë: tragjedi në futbollin argjentinas

Futbolli argjentinas është tronditur nga tragjedia e vdekjes së një futbollisti të ri, Abel Nunez, pas një goditjeje të topit në kokë. 18-vjeçari, i cili luante në ekipet e moshave të klubit Futbol Club Ezeiza, ndërroi jetë si pasojë e traumës kraniale të pësuar gjatë një ndeshjeje të Divizionit të Pestë të turneut “Juveniles C” të Federatës Argjentinase të Futbollit, kundër Deportivo Muniz. Incidenti ndodhi fundjavën e kaluar, ndërsa Nunez ndërroi jetë të dielën.

Rrethanat që çuan në vdekjen e të riut janë vërtet të vështira për t’u pranuar. Ai po luante pa asnjë problem, kur topi e goditi me forcë në kokë. Pas goditjes, u rrëzua pa ndjenja në fushën e lojës dhe nuk dha më asnjë shenjë reagimi. Situata u duk menjëherë e rëndë: fillimisht iu dha ndihma e parë në vendngjarje dhe më pas u transportua në një qendër mjekësore. Ndërkohë, arbitri vendosi ndërprerjen e menjëhershme të ndeshjes. Më vonë u anulua edhe takimi që ishte planifikuar të zhvillohej pas saj.

U godit me gju në fytyrë nga portieri, Jesús de Miguel humb jetën: 30 vjeçari nuk ia del
3 Nëntor, 11:47
Nunez iu nënshtrua një ndërhyrjeje kirurgjikale në kokë, por gjendja e tij nuk u përmirësua dhe të dielën klubi i tij njoftoi vdekjen përmes një deklarate: “Lajmi më i rëndë që na është dashur të komunikojmë si klub. Me dhimbje të thellë dhe trishtim të pafund, i japim lamtumirën një djali që kishte një jetë të tërë përpara dhe që sot na lë pas një boshllëk të pamundur për t’u shpjeguar. Sot futbolli kalon në plan të dytë. Na ka pushtuar dhimbja për humbjen e një shoku, një të riu plot ëndrra dhe shpresa, i cili ishte pjesë e familjes sonë. Nga Club Ezeiza dëshirojmë t’i shprehim ngushëllimet tona më të sinqerta dhe gjithë mbështetjen familjarëve, miqve, shokëve të skuadrës dhe njerëzve të tij të dashur në këtë moment kaq të vështirë. U prehsh në paqe. Do të jesh gjithmonë pjesë e familjes sonë”.

Nunez mbante fanellën me numrin 10 dhe luante në pozicionin e mesfushorit ofensiv. Ai ishte bashkuar me FC Ezeiza verën e kaluar, ndërsa njëkohësisht luante edhe futsal. Një djalë si shumë të tjerë, me një pasion të pafund për futbollin. Abeli përshkruhej si një i ri plot ëndrra: ndoshta një ditë do të bëhej kampion, ndoshta jo. Është jashtëzakonisht e trishtueshme që nuk do të mund ta mësojmë kurrë.

Presidenti i Federatës Argjentinase të Futbollit, Chiqui Tapia, shprehu ngushëllimet e gjithë futbollit argjentinas përmes një mesazhi të publikuar në platformën X: “Me dhimbje të thellë njoftojmë ndarjen nga jeta të Abel Nunez, i cili ishte pjesë e ekipeve të moshave të FC Ezeiza. Në këtë moment të vështirë, dëshiroj t’i shpreh ngushëllimet e mia më të sinqerta dhe t’i dërgoj një përqafim të madh familjes, miqve dhe njerëzve të tij të dashur. U prehsh në paqe, Abel”.

“Nuset e Vilës Blu” – Roman nga Flamur Buçpapaj

Romani i ri i autorit Flamur Buçpapaj, botuar nga Nacional, sjell një udhëtim mes dashurisë, dhimbjes dhe kujtesës – aty ku e kaluara dhe e tashmja takohen në një vilë blu plot sekrete. Gjej librin në libraritë kryesore dhe mëso pse “Vila Blu” nuk është thjesht një vend… por një simbol i shpirtit shqiptar. Për porosi ose kontakt: 067 533 2700
Scroll to Top