Anglia siguroi kualifikimin në gjysmëfinalet e Botërorit pasi mposhti Norvegjinë 2-1 pas kohës shtesë. Heroi i ndeshjes ishte Jude Bellingham, autor i dy golave vendimtarë. Ishte Norvegjia që kaloi e para në avantazh me një goditje të saktë me të majtën nga Schjelderup, e cila befasoi Jordan Pickfordin. Më pas Bellingham riktheu baraspeshën, duke bërë që pjesa e parë të mbyllej 1-1.
Në pjesën e dytë pati raste të shumta, ndërhyrje të VAR-it, traversa dhe gola të anuluar, por rezultati nuk ndryshoi. Ndeshja shkoi në kohën shtesë, ku Bellingham shënoi edhe një herë golin e përmbysjes, duke i dhuruar Anglisë fitoren dhe biletën për në gjysmëfinale.
Dy gola dhe ekuilibër në pjesën e parë
Pjesa e parë u ndez vetëm në minutat e fundit. Deri atëherë, të dyja skuadrat u treguan të kujdesshme dhe luajtën me shumë pragmatizëm, duke pritur gabimin e kundërshtarit. Norvegjia zhbllokoi rezultatin falë Schjelderupit, i cili u fut nga krahu i majtë dhe goditi bukur me të majtën, duke dërguar topin në cepin e largët të portës së Pickfordit, që nuk reagoi në mënyrën më të mirë.
Norway 🇳🇴 1 vs 0 England 🏴 first goal by Norway
by
u/maxworld25 in
worldcup
Norvegjezët mund ta dyfishonin avantazhin, por Alexander Sørloth shpërdoroi dy raste të mira. Anglia përfitoi menjëherë dhe barazoi me Jude Bellingham, i cili depërtoi në zonë pas një pasimi nga e majta dhe realizoi me një goditje diagonale me të majtën. Në minutat shtesë të pjesës së parë, Harry Kane mendoi se kishte përmbysur rezultatin me një parabëlë ndaj portierit kundërshtar, por goli u anulua për pozicion jashtë loje. Pjesa e parë u mbyll në barazim 1-1.
It’s 1-1 now ENGLAND & NORWAY on their way for another set of GOALSSSS
by
u/AwkwardWhereas6378 in
worldcup
Pjesa e dytë: VAR-i dhe traversa mbajnë në lojë Anglinë
Trajneri Thomas Tuchel e nisi pjesën e dytë duke zëvendësuar Declan Rice dhe Noni Madueke me Bukayo Saka dhe Eberechi Eze, në përpjekje për t’i dhënë më shumë ritëm sulmit. Edhe Norvegjia reagoi me hyrjen në fushë të Oscar Bobb dhe Antonio Nusa në vend të Sørloth dhe Schjelderup, duke krijuar më shumë probleme për mbrojtjen angleze. Norvegjezët arritën të shënonin me Heggem pas një topi të kthyer nga Pickford, por arbitri Clément Turpin u thirr nga VAR-i dhe, pas rishikimit në monitor, vendosi ta anulonte golin.
Rreth 15 minuta para fundit, Norvegjia iu afrua sërish golit me Kristoffer Ajer, i cili goditi traversën. Në minutat e fundit Anglia reagoi me një aksion të Bukayo Sakas, i cili kaloi dy mbrojtës dhe krosoi në zonë për Ezen, por ky i fundit u ndal në momentin e fundit nga mbrojtja norvegjeze. Koha e rregullt përfundoi 1-1.
Koha shtesë
Në fillim të kohës shtesë, trajneri Ståle Solbakken zëvendësoi Heggem me Leo Østigård. Kur dukej se ndeshja po shkonte drejt penalltive, Anglia gjeti golin vendimtar. Morgan Rogers provoi me një goditje nga distanca, portieri Nyland nuk arriti ta largonte si duhet topin dhe Bellingham, i gjendur në vendin e duhur, shënoi nga afër për rezultatin 2-1. Pak minuta më vonë, arbitri Turpin akordoi penallti për Norvegjinë pas një kontakti mes Djed Spence dhe Oscar Bobb. Megjithatë, pas ndërhyrjes së VAR-it dhe rishikimit të pamjeve, ai ndryshoi vendimin, duke vlerësuar se ishte Spence ai që kishte kërkuar kontaktin.
Genuine Question – How Come FIFA is Saying This Did Not Hit The Cable?
by
u/New-Process-6463 in
worldcup
Në pjesën e dytë të kohës shtesë, Norvegjia mori një tjetër goditje të rëndë, pasi Erling Haaland u detyrua të largohej nga fusha për shkak të një problemi fizik. Pa sulmuesin e saj kryesor, Norvegjia nuk arriti të rikthehej në lojë. Pavarësisht disa përpjekjeve të fundit, rezultati nuk ndryshoi dhe me vërshëllimën përfundimtare ishte Anglia që festoi kualifikimin në gjysmëfinalet e Botërorit.
