Eurodeputetja gjermane e të Gjelbërve, Jutta Paulus, ka reaguar pas përplasjeve mes protestuesve dhe policisë në Tiranë. Paulus ka deklaruar se “dhuna nuk është kurrë e pranueshme”. Në një prononcim për Politico, eurodeputetja tha se protesta, ku mori pjesë të hënën, ishte zhvilluar në një atmosferë paqësore, me pjesëmarrjen e shumë familjeve dhe fëmijëve. Lidhur me incidentet e së martës, ajo u shpreh se nuk ishte e pranishme, por nënvizoi se çdo formë dhune është e papranueshme.
Përplasjet ndodhën të martën para Kuvendit. Protestuesit u mblodhën gjatë zhvillimit të seancës plenare. Gjatë tubimit pati tensione mes protestuesve dhe policisë. Gjashtë aktivistë u shoqëruan nga forcat e rendit.
Pas ndalimeve, protestuesit marshuan drejt Drejtorisë së Policisë së Tiranës, duke kërkuar lirimin e të arrestuarve dhe duke akuzuar policinë për përdorim të dhunës. Në mbështetje të protestuesve kanë qenë në Tiranë edhe eurodeputetet Tineke Strik, Ilaria Salis dhe Anna Strolenberg.
