Norvegjia nuk ndalet dhe pasi i shënoi katër gola Irakut në debutimin në Botëror, i shënon tre edhe Senegalit (3-2), duke marrë biletën për në 1/16-at dhe duke treguar se është një kombëtare që duhet marrë seriozisht. Protagonist absolut, pa diskutim, i zakonshmi Erling Haaland, sërish autor i një dygolëshi pas atij në ndeshjen e parë. Ndeshje pothuajse pa histori në “New York/New Jersey Stadium”, me skandinavët që që në fillim në presion dhe disa herë të rrezikshëm para golit që zhbllokon sfidën, të firmosur nga Holmgren Pedersen në minutën e 43-të. As koha për të riorganizuar idetë dhe Senegali pëson dyfishimin nga Haaland në të 48-ën.
Por kur ndeshja duket e mbyllur, zgjohet Senegali, që ngushton diferencën me Sarr në minutën e 53-të, por iluzioni i kombëtares afrikane zgjat pesë minuta, pra koha që i duhet Haaland për të thelluar sërish diferencën. I padobishëm, në shtesë, në minutën e 93-të, goli i 3-2 i shënuar sërish nga Sarr. Norvegjia bën dy fitore në dy ndeshje, si Franca, dhe do të luajë për vendin e parë në Grupin I pikërisht kundër “gjelave” në ndeshjen e fundit. Senegali, ndërkohë, mbetet me zero pikë, ashtu si Iraku.
JORDANI-ALGJERI 1-2
Algjeria mban gjallë ëndrrën e kualifikimit falë fitores 2-1 me përmbysje kundër Jordanisë në një ndeshje të Grupit J që u luajt në San Francisko. Ndeshje e vështirë për njerëzit e Petkovic, të cilët në minutën e 36′ befasohen nga goli jordanez i Al Rashdan, i shërbyer nga një asist i saktë i Suleiman Al Tamari. Në pjesën e dytë, megjithatë, Algjeria ngre kokën dhe gjen barazimin me Benbouali në minutën e 68′, përpara se të mbyllë llogaritë me Gouiri në të 82′.
Afrikano-veriorët, jo pa vështirësi, arrijnë kështu Austrinë në kuotën e 3 pikëve, në vendin e dytë të grupit pas Argjentinës, me të cilën do të duhet të përballen në ndeshjen e fundit dhe vendimtare. Për Austrinë e Rangnick, ndërkohë, një sfidë më e përballueshme kundër Jordanisë, e mbetur në zero pikë pas dy ndeshjesh.
