Këngëtarja dhe aktorja Jessica Simpson ka bërë një rrëfim të sinqertë për presionin që përjetoi në fillimet e karrierës së saj muzikore.
Gjatë një koncerti në Pensilvani, 45-vjeçarja tregoi se shtëpia e saj diskografike i kishte kërkuar të humbiste peshë për t’u përshtatur me imazhin e yjeve të muzikës pop të asaj kohe, si Britney Spears dhe Christina Aguilera.
“Kur fillova të këndoja, sipas kompanisë diskografike duhej të isha një yll pop. Ishin Britney Spears dhe Christina Aguilera, të cilat i donim dhe i mbështesnim, por mua më duhej të ndiqja gjurmët e tyre,” tha Simpson para publikut.
Ajo kujtoi se ishte vetëm 17 vjeçe kur drejtuesit e industrisë muzikore i kërkuan të humbiste rreth 15 paund (afërsisht 7 kilogramë), edhe pse në atë kohë peshonte vetëm rreth 52 kilogramë.
“Mendoja se më kishin kontraktuar për zërin tim, por papritur më thanë: ‘Duhet të humbasësh 15 paund’. Për një vajzë 17-vjeçare, kjo ishte shumë e vështirë,” rrëfeu ajo.
Sipas Simpson, presioni vazhdoi edhe gjatë publikimit të albumit të saj të dytë, “Irresistible”, kur iu kërkua të kishte bark të tonifikuar dhe pamje më atletike.
“Më thanë se duhej të kisha bark me muskuj. Por unë thjesht nuk jam ndërtuar në atë mënyrë. Kam pak bark dhe jam krenare për këtë,” u shpreh këngëtarja.
Ajo shtoi se gjatë gjithë karrierës është përpjekur të përmbushë pritshmëritë e të tjerëve për atë se si duhej të dukej dhe të sillej Jessica Simpson.
“Kishte gjithmonë diçka që duhej të ndryshoja për t’u bërë versioni i Jessica Simpson që ata mendonin se do të ishte i suksesshëm. Gjithmonë ndihesha si një dështim, sepse nuk isha kurrë mjaftueshëm e mirë,” tha ajo.
Jessica Simpson u bë e famshme në fund të viteve ’90 me hitin “I Wanna Love You Forever” dhe albumin debutues “Sweet Kisses”. Vitin e kaluar ajo publikoi muzikë të re për herë të parë pas 15 vitesh, duke treguar se rikthimi në skenë e ka ndihmuar të shërohet emocionalisht dhe të rifitojë besimin në vetvete.
