Në orët e fundit është publikuar videoja që tregon Lamborghini-n e Raheem Sterling duke lëvizur në mënyrë kaotike me shpejtësi të lartë në autostradë, para se të përplasej dhe të çonte në arrestimin e sulmuesit anglez 31-vjeçar, ish-lojtar i kombëtares së “Tre Luanëve”, aktualisht pjesë e Feyenoord.
Drejtimi i rrezikshëm i Sterling ishte pasojë e gjendjes së tij të alteruar, siç konstatoi policia që e ndaloi dhe më pas e liroi me akuzën për drejtim mjeti nën efektin e substancave narkotike.
Pamjet e Lamborghini-t të Sterling që lëkundet në autostradë
Pamjet, të filmuara nga “dash cam” e një automjeti tjetër pas Lamborghini-t të ish-lojtarit të Liverpool dhe Manchester City, tregojnë qartë supermakinën me vlerë mbi 300 mijë euro duke lëvizur papritur nga e majta (që në Britani është korsia me shpejtësinë më të ulët) pa sinjalizuar, duke kaluar korsitë e autostradës dhe duke u zhvendosur në skajin e djathtë deri sa prek pothuajse barrierën ndarëse të dy drejtimeve të lëvizjes.
Në videon e siguruar nga “Daily Mail”, Sterling shihet duke udhëtuar në autostradën M3 në segmentin e Hampshire, që lidh Londrën me bregdetin jugor të Anglisë. Pamjet e sjelljes së tij të pakontrolluar në timon paraprijnë me pak minuta arrestimin e futbollistit, që ndodhi të enjten e kaluar në orën 09:00 të mëngjesit me akuzën për drejtim mjeti nën efektin e lëndëve narkotike, pasi ishte përplasur me barrierat anësore të autostradës.
Rrezikshmëria e manovrës së sulmuesit të lindur në Xhamajkë bëhet edhe më e qartë nga fakti se, duke hyrë pa paralajmërim në korsinë e parakalimit në të djathtë, Sterling vuri në vështirësi drejtuesin e një furgoni kompanie, i cili qartësisht nuk e priste një veprim të tillë dhe, duke lëvizur me shpejtësi më të madhe, u detyrua të frenonte. Më pas futbollisti ktheu sërish timonin majtas, duke kaluar edhe një herë të gjitha korsitë e autostradës.
Ex-England footballer Raheem Sterling veers his £270k Lamborghini across three lanes while driving erratically on the M3, minutes before crash
He can be seen with what looks to be a balloon filled with 'hippy crack' as he turns back into the inside lanehttps://t.co/rbklDnj6iC pic.twitter.com/1A43BM7Fl2
— Video Forensics (@Video_Forensics) June 1, 2026
Në video shihet Sterling duke ngarë makinën me një tullumbace me gaz esilirant në gojë
Videoja tregon mjaft qartë edhe diçka tjetër: në një moment shihet Sterling me një tullumbace të fryrë në gojë. Kuptimi mund të jetë vetëm një, thithja e të ashtuquajturit “hippy crack”, gazit qesharak që përdoret për t’u dehur, i cili sjell me vete rreziqe të shumta për shëndetin, pa përmendur faktin jashtëzakonisht të rëndë të përdorimit të tij në mënyrë të papërgjegjshme gjatë drejtimit të mjetit dhe për më tepër me shpejtësi të lartë në autostradë.
Pamjet e “dash cam” u siguruan nga një instruktor drejtimi që ishte me pushime me familjen e tij në Dorset. Automobilisti, i cili kërkoi të mbetej anonim, deklaroi: “Ndodhesha në korsinë qendrore kur, pa asnjë paralajmërim, një Lamborghini e zezë më preu rrugën, duke më detyruar të ngadalësoja. Makina fillimisht u kthye në korsinë e brendshme, më pas drejtuesi shtypi fort gazin dhe ktheu papritur djathtas duke kaluar të tri korsitë, duke shmangur për pak përplasjen me barrierën qendrore ndarëse.
Një shofer furgoni që e ndiqte u detyrua të frenonte, pas së cilës makina u nis me shpejtësi, duke kaluar tri korsitë dhe duke u kthyer sërish në korsinë e brendshme”. “Automobilisti lëkundej në të gjitha drejtimet, por nuk e kisha idenë se ishte Raheem Sterling derisa pashë se ishte arrestuar me akuzën për drejtim mjeti nën efektin e lëndëve narkotike pranë nyjës së Minley. Raheem më pëlqen, por si instruktor drejtimi jam shumë i shqetësuar. Mund t’i kishte shkaktuar lehtësisht dëme të rënda vetes dhe të tjerëve. Ka qenë shumë me fat që nuk ndodhi”, përfundoi dëshmitari.
Pak pas pamjeve të videos, Lamborghini i Sterling goditi barrierën anësore, u përplas dhe bëri një gjysmë rrotullimi, me rrotat që u ngritën rreth një metër nga toka. Komunikata e forcave të rendit flet për “arrestim me akuzën e drejtimit nën efektin e lëndëve narkotike, drejtim të rrezikshëm, posedim të substancave narkotike të klasit C dhe refuzim për t’iu nënshtruar testit të alkoolit”, si dhe për “lirimin me kusht në pritje të vazhdimit të hetimeve”.
Fatmirësisht aksidenti nuk përfshiu automjete të tjera dhe nuk pati të lënduar. Megjithatë, hijet mbi fundin e karrierës së futbollistit po bëhen gjithnjë e më të mëdha: kohët e arta duken shumë larg për Raheem, brenda dhe jashtë fushës.
