Një atmosferë e rënduar ka pushtuar Torinon pak orë para fillimit të derbit të zjarrtë mes Torinos dhe Juventusit. Përplasjet e dhunshme mes tifozëve në zonën adiacente sektorit të të ftuarve të stadiumit “Grande Torino” kanë rezultuar në plagosjen e rëndë të një tifozi të Juventusit dhe kanë shtyrë ultrasit e klubit bardhezi të kërkojnë anulimin e ndeshjes, me skuadrat që mbeten të mbyllura në dhomat e zhveshjes.
Tensioni ishte i lartë në qiellin e Torinos. Sipas informacioneve të para, grupe të ultrashve më të dhunshëm të të dyja palëve janë konfrontuar ashpër. Dëshmitarët raportojnë hedhje shishesh dhe gurësh drejt forcave të policisë, të cilat u detyruan të përdornin gaz lotsjellës për të qetësuar situatën. Disa tifozë, si nga skuadra vendase ashtu edhe ajo mysafire, janë ndaluar nga agjentët dhe policët e pranishëm.
Situata u përkeqësua kur një tifoz 45-vjeçar i Juventus u godit në kokë. Disa burime sugjerojnë se mund të jetë goditur nga gazi lotsjellës i hedhur nga forcat e rendit në lartësi njeriu. Burri u transportua me urgjencë nga ekipet mjekësore në spitalin Mauriziano, e më pas në CTO, në kod të kuq për traumë kraniale. Edhe pse në gjendje të rëndë, jeta e tij nuk raportohet në rrezik, ndërsa po kryhen hetime për të përcaktuar saktësisht se çfarë e ka goditur.
Në shenjë proteste ndaj incidentit dhe veprimeve të policisë, ultrat e Juventus, të futur në zonën e miqve (pa flamuj apo simbole), kanë thirrur skuadrën nën tribunë për të kërkuar moszhvillimin e ndeshjes. Disa përfaqësues të tifoorganizuar folën drejtpërdrejt me kapitenin Locatelli për t’i shpjeguar situatën e rëndë.
Incidenti u komentua edhe nga Damien Comolli, i cili shprehu shqetësimin e thellë: “Jemi shumë të shqetësuar dhe të trishtuar për atë që ndodhi jashtë stadiumit. Kemi një tifoz tonë në spital në gjendje të keqe, në kod të kuq. Ultrasit e tjerë nuk janë të kënaqur me atë që ndodhi dhe na kanë kërkuar të mos zbresim në fushë. Ndeshja do të luhet dhe pas saj do të shkoj të vizitoj tifozin e plagosur në spital.”
Pavarësisht kërkesave të tifozëve dhe tensionit të lartë, ndeshja pritet të zhvillohet sipas planit, ndërsa forcat e sigurisë po punojnë për të garantuar zhvillimin e saj në kushte të sigurta.
