Mes emrave që po qarkullojnë në këto orë si trajneri i ri i Italisë është edhe ai i Carlo Ancelotti, në një moment kur vendi po përgatitet të rilançojë plotësisht sistemin e vet të futbollit. Aktualisht trajneri 67-vjeçar është në krye të Brazilit pikërisht si trajner i kombëtares dhe kontrata e firmosur në maj 2025 parashikon qëndrimin e tij me verdhejeshilët për 14 muaj, pra deri në fund të Botërorit 2026 në Amerikën e Veriut, me bonuse të pasura në rast fitimi të trofeut.
Në tavolinë, megjithatë, duket se ekziston tashmë një rinovim i pasur deri në vitin 2030, që do t’i krijonte kushtet Ancelottit për të hapur një cikël me Seleçaon.
Oferta e Brazilit për rinovimin
Për të, një pagë vjetore prej rreth 7.5 milionë eurosh dhe një bonus prej 5 milionë eurosh në rast se Brazili fiton Kupën e Botës 2026, trofe që mungon që nga viti 2002 në Japoni dhe Kore të Jugut. Gjithçka dukej se të çonte drejt zgjatjes së marrëveshjes, edhe pse Ancelotti nuk kishte llogaritur një tjetër dështim të Italisë, e mbetur për herë të tretë radhazi jashtë Botërorit. Dorëheqja e Gravinës dhe nisja e një revolucioni në kombëtare mund ta bëjnë të ndryshojë mendje. Por si?
Ancelotti, në një intervistë të fundit, kishte bërë të ditur se do ta pranonte së shpejti rinovimin me Brazilin: “Besoj se do ta rinovoj me Brazilin edhe për katër vite të tjera. Kam një punë të re që më pëlqen shumë”, shpjegonte ai në emisionin Universo Valdano, të drejtuar nga ish-lojtari argjentinas Jorge Valdano në kanalin Movistar.
Katastrofa e Italisë mund të ndryshojë skenarët
Megjithatë, kjo ishte para se Italia të eliminohej edhe një herë nga Botërori. Dhe kështu, në pasditen e trazuar të sotme, u përmend edhe emri i Ancelottit si trajneri të cilit mund t’i besohet pankina e Italisë. Kontrata e tij me Brazilin është aktualisht e vlefshme deri në fund të Botërorit dhe vetëm në një rast mund të mendohet për mungesë rinovimi.
Hipoteza e një dështimi total të Brazilit në Botëror mund të hapë qartë skenarin e Ancelottit si trajner i Italisë. Do të ishte një tjetër ndërrim pankine me Gennaro Gattuso pas atij te Napoli, por këtë herë me rolet e përmbysura. Megjithatë, në këtë moment në shtëpinë e Italisë gjithçka mbahet e mbyllur dhe pritet të kuptohet se kush do të marrë timonin e FIGC përpara se të vendosen fatet e trajnerit, që aktualisht mbetet ende Ringhio Gattuso, pavarësisht dorëheqjeve të Gravinës dhe Gianluigi Buffon.
