Në një sfidë vendimtare si ajo me Poloninë dilemat më të mëdha lidhen me ofensivën kuqezi. Dëmtimet e Dakut e Manajt janë vërtetë të rënda e penalizuese, por thirrjet e lojtarëve si Ernest Muçi e Anis Mehmeti garantojnë gola e intensitet të lartë. E gjithë çështja është nëse do të guxojmë t’i përdorim, në ndeshjen e jetës…
Mungesat janë gjithnjë një problem, por në rastin e Shqipërisë nuk është çështje kualiteti e golash, por mekanizmi loje. Në sfidën vendimtare kundër Polonisë, në gjysmëfinalen e playoff, Mirlind Daku e Rei Manaj konsiderohen dy goditje të rënda për teknikun Sylvinho, në ëndërrën kuqezi për prezencën e parë historike në Botërorin 2026. 10 gola sezonalë në dy kampionate të Reit dhe 9 të Dakut nxjerrin jashtë luftimi dy armët më të mira ofensive të Shqipërisë, por nuk është se mungojnë lojtarët e aftë që të na cojnë të golat.
Dilemat ofensive
Thirrja e Ernest Muçit dhe Anis Mehmetit, prej kohësh të kërkuar nga specialistë të fushës dhe tifozët, mbushin jo keq hendekun. Me Trabzonspor Muçi ka shënuar 10 gola e 4 asist në 24 paraqitje e nuk ka bërë më pak Mehmeti në Championship, ku edhe pas kalimit te Ipswich vazhdon të koleksionojë minuta e realizime, për një total prej 10 golash e 8 asist në 39 prezenca. Çështja është e gjitha nëse do të kemi guximin ti përdorim, duke qenë se Sylvinho i kishte lënë jashtë thirrjeve aq gjatë sa tani të dy nuk ndihen më si në shtëpi, pavarësisht se do të duan të tregojnë sa gabim ka bërë braziliani në këto kohë.
Sylvinho i prirur për “sigurinë”
Tendenca për të luajtur me sigurinë, në mënyrë që të mos gabohet me lojtarë që nuk kanë perfeksionuar mekanizmat e lojës si të tjerët, që duhet thënë nuk kanë as minutat e as ritmin e Muçit e Mehmetit, mund të ndikojë jo pak në zgjedhjet e Sylvinhos. Duhet guxim për të marrë atë që guxuam të ëndërrojmë, e për ti dhënë Uzunit suportin e duhur për të mos ndjerë mungesën e askujt, as atij Brojës që aq gjatë e pritëm, por që vjen në ndeshjen e të vërtetës pa minuta e me rrezikun për ta bërë të japë një tjetër performancë nën ton, që më shumë se i jep dorën e minutave, i heq mbështetjen e moralit, aq të nevojshme për shkodranin, në beteja personale me një kalvar të tërë dëmtimesh.
