Pep Guardiola të dielën shtoi një tjetër trofe në palmarès-in e tij, duke fituar me Manchester City finalen e Kupës së Ligës kundër Arsenal, falë edhe gabimit të rëndë të portierit Kepa në rastin e golit të parë të Nico O’Reilly, protagonist absolut i ndeshjes me dygolëshin e tij. Një ndeshje që ka lënë gjurmë të dukshme të tensionit në kokën e trajnerit katalanas 55-vjeçar.
Guardiola, nuk është hera e parë
Kamerat treguan disa gërvishtje pothuajse me gjak në anën e majtë të kokës së rruar të spanjollit Guardiola, të cilat nuk i kishte kur u ul në pankinë në Wembley. Rikthehet kështu tema e akteve të vetëlëndimit të teknikut kur stresi arrin kulmin dhe ai nuk arrin të kontrollojë lëvizjet e gishtave, që “torturojnë” lëkurën e zhveshur të kokës së tij.
Një sjellje që kishte shkaktuar shqetësim edhe në nëntor 2024, kur – gjatë një periudhe të gjatë krize – Manchester City u rikuperua në Champions League nga Feyenoord, duke kaluar nga 3-0 në 3-3 përfundimtare. Në atë rast, pas ndeshjes Guardiola ishte paraqitur para mikrofonëve me kokën dhe hundën të mbuluara me gërvishtje, duke iu përgjigjur një pyetjeje specifike: “Gërvishtjet? I kam bërë me gishtat e mi. Dua t’i bëj keq vetes”.
'I want to harm myself' 👀 Pep asked about the cuts on his nose and head pic.twitter.com/VQVCQ9brzy
— BeanymanSports (@BeanymanSports) November 26, 2024
Fjalë që i sollën kritika, pasi jepte një shembull që sigurisht nuk duhej ndjekur, dhe në fakt disa orë më vonë Guardiola bëri një hap pas, duke dërguar një mesazh të kundërt: “U kapa në befasi nga një pyetje, përgjigjja ime nuk kishte për qëllim në asnjë mënyrë të tallej me problemin shumë serioz të vetëlëndimit”.
Fakti është se presioni, gjithmonë shumë i lartë mbi të, i ka bërë edhe një herë një shaka të keqe katalanasit. Tabloidët kanë ripropozuar menjëherë imazhet e atyre gërvishtjeve të kuqe, që këtë herë nuk ishin objekt pyetjesh pas ndeshjes. Guardiola përkundrazi ka mbushur kraharorin për trofeun e radhës të fituar që kur mbërriti në Angli: “19 tituj në 10 vite te Manchester City, në epokën moderne, në Angli, në Europë… respekt për gjithë organizatën”.
