Përcaktohen sonte edhe katër skuadrat e tjera çerekfinaliste në Champions League që do ti bashkohen, Real Madrid, PSG, Sporting e Arsenal. Për Bayern Munich e Atletico Madrid duke një detyrë e thjeshtë, duke parë goleadat e ndeshjeve të para, por Barcelona e Liverpool duhet të shfrytëzojnë stadiumet mike për të mposhtur Newcastle e Galatasaray, me turqit madje që shkojnë në Anfield me avantazhin e një goli.
BAYERN MUNICH-ATALANTA
Atalanta paraqitet në Mynih për të luajtur ndeshjen e kthimit të 1/8-ave të Champions League kundër Bayern, pas 6-1 poshtërues të pësuar në shtëpi në Bergamo. Një mision i pamundur, i bërë i tillë nga një ndeshje e parë e dominuar plotësisht nga gjermanët e Kompany, të aftë për të varrosur shpresat e “Dea”-s me një goleadë mbresëlënëse. Ndeshja e parë e 1/8-ave nuk pati histori përtej rezultatit të bujshëm 6-1 në favor të gjermanëve, të cilët tani e shohin veten tashmë në çerekfinale.
Për Atalantën mbetet nderi dhe krenaria për të qenë e fundit nga skuadrat italiane që rezistoi në Europë dhe do të provojë të dalë me kokën lart nga Allianz Arena, duke përfituar edhe nga problemet në portë që kanë gjermanët, të detyruar të përdorin portierin e katërt nëse Urbig nuk rikuperohet nga trauma në kokë. Ndeshja luhet në Allianz Arena dhe riniset nga 6-1 i ndeshjes së parë. Kush do të sigurojë kalimin në çerekfinalet e Champions League, do të përballet me skuadrën e kualifikuar mes Manchester City dhe Real Madrid.
Duke përmendur vështirësitë në portë të Bayern, ku nëse Urbig nuk ia del, është gati 16-vjeçari Prescott, në mesfushë Bischof do të luajë në vend të Olise në krahun e djathtë. Në sulm mund të ketë një pushim për Kane. Palladino duket i orientuar drejt rikthimit te mbrojtja me tre, me Scalvini dhe Kolasinac në krahët e Djimsiti. Në sulm sërish hapësirë për Scamacca, i mbështetur nga Samardzic dhe Zalewski, ndërsa De Ketelaere, i rikthyer nga dëmtimi, është gati të futet gjatë ndeshjes.
BARCELLONA–NEWCASTLE
Nën dritat e Camp Nou të rinovuar, Barcelona përballet me Newcastle United në një përballje “fituesi merr gjithçka” për një vend në çerekfinalet e Champions League. Skena është gati për një ndeshje të kthimit plot ritëm të mërkurën, në takimin e tretë këtë sezon mes dy skuadrave. Newcastle ka mjetet për të qenë besimplotë për shanset e tij, por në Camp Nou, Barcelona është një “bishë” krejt tjetër.
Sa frikësuese ishte atmosfera kundër Barcelonës në ndeshjen e parë, po aq euforike do të jetë në favor të tyre, ndërsa Camp Nou pret ndeshjen më të madhe që nga rihapja. Newcastle duhet të zhvillojë një ndeshje pothuajse perfekte në një ambient armiqësor nëse dëshiron të ketë ndonjë shans për t’u kualifikuar.
Katalanasit mund të kenë disa mungesa, por në shtëpi janë në maksimumin e tyre dhe janë të aftë të “shkatërrojnë” çdo kundërshtar — mjafton të pyesni Atletico Madrid se çfarë ndodhi dy javë më parë. Newcastle do të ketë rastet e veta, por rrjedha e përgjithshme e ndeshjes mund të jetë krejt e kundërta e asaj të ndeshjes së parë. Do të kërkohet shumë nga mbrojtja e Magpies dhe, përballë një prej sulmeve më të forta në Europë, detyra mund të jetë tepër e vështirë për skuadrën e Eddie Howe.
LIVERPOOL–GALATASARAY
Tifozët e Anfield janë thirrur të frymëzojnë Liverpool drejt çerekfinaleve të Champions League të mërkurën në mbrëmje, ndërsa Galatasaray viziton Merseyside për ndeshjen e kthimit të 1/8-ave. Liverpool u mund 1-0 për herë të dytë këtë sezon në RAMS Park dhe humbja e javës së kaluar i lë shumë punë për të bërë në shtëpi nëse duan të shmangin një tjetër eliminim në këtë fazë të kompeticionit. Liverpool pati vështirësi në Turqi javën e kaluar pas një fillimi mjaft të mirë, me Florian Wirtz që humbi dy raste para dhe pas golit të Mario Lemina që mund të kishin ndryshuar dinamikën e përballjes.
Tani kanë punë për të bërë në Anfield dhe skuadra e Slot nuk po performon si një ekip i aftë për të përjetuar një natë klasike europiane në Merseyside. The Reds vazhdojnë të luajnë me një ritëm monoton, pa kontroll, dhe tifozët e Liverpool po e kanë të vështirë të mbështesin atë që po shohin nga lojtarët e Slot. Ndoshta dëshpërimi i mbrëmjes së të mërkurës mund të ndezë një shkëndijë, por skuadra mysafire duhet të ndiejë se ka një mundësi të madhe për t’i rezistuar vendasve, pavarësisht rënies së tyre në Torino në raundin e kaluar.
TOTTENHAM–ATLETICO MADRID
Tottenham Hotspur synon një përmbysje të vështirë në ndeshjen e kthimit të 1/8-ave të Champions League kundër Atletico Madrid të mërkurën në mbrëmje. Atléti luan jashtë fushe për herë të parë që kur pothuajse humbi avantazhin 4-0 të ndeshjes së parë në gjysmëfinalen e Copa del Rey kundër Barcelonës. Skuadra e Hansi Flick fitoi 3-0 në ndeshjen e kthimit, duke bërë që ekipi i Simeone të mbante me vështirësi avantazhin.
Tottenham, sigurisht, nuk ka fuqinë sulmuese të Barcelonës, por një rezultat i tillë tregon se një “remontada” e bujshme nuk është plotësisht e pamundur kundër këtij Atléti. Rezultati i së dielës do të thotë se gjysma “Lilywhite” e veriut të Londrës do të jetë më pak e zymtë se zakonisht, por shumica dërrmuese janë të shqetësuar për ndeshjen e ardhshme në Premier League, kur Nottingham Forest viziton N17 në një përballje vendimtare për mbijetesë.
