Moti i keq goditi Shtetet e Bashkuara këtë fundjavë, duke sjellë borë, akull dhe shira të rrëmbyeshëm në shumë pjesë të vendit, duke shkaktuar të paktën shtatë viktima dhe duke lënë pa energji elektrike qindra mijëra shtëpi. Rreth 157 milionë amerikanë u paralajmëruan se do të përballeshin me temperatura të ftohta që varionin nga nën zero gradë përgjatë kufirit kanadez deri në Gjirin e Meksikës.
Shkollat dhe rrugët në të gjithë vendin janë mbyllur dhe fluturimet janë anuluar ndërsa kushtet “kërcënuese për jetën” shtrihen nga Teksasi në Anglinë e Re, sipas Shërbimit Kombëtar të Motit (NWS).
Të paktën dy persona vdiqën nga hipotermia në Luiziana, ndërsa vdekje të tjera të lidhura me stuhinë janë raportuar në Teksas, Tenesi dhe Kansas. Një milion familje mbetën pa energji elektrike, sipas poweroutage.us, ndërsa më shumë se 11,000 fluturime u anuluan, raportoi FlightAware.
Reshjet e dendura të dëborës, breshëri dhe shiu i ngrirë, një fenomen i rrezikshëm ku pikat e ftohta të shiut ngrijnë menjëherë në sipërfaqe, mund të zgjasin me ditë të tëra, pasi stuhia mund të prekë rreth 180 milionë amerikanë – më shumë se gjysmën e popullsisë.
“Bora dhe akulli do të shkrihen shumë, shumë ngadalë dhe nuk do të zhduken së shpejti, dhe kjo do të pengojë çdo përpjekje për rimëkëmbje”, tha për CBS News Alison Santorelli, një meteorologe në Shërbimin Kombëtar të Motit . Departamenti i Shëndetësisë i Luizianës konfirmoi të dielën se dy burra kishin vdekur nga hipotermia.
Vorbulla polare — një unazë erërash të forta perëndimore që formohet mbi Arktik çdo dimër dhe përmban një pellg ajri shumë të ftohtë — çoi në stuhinë e fuqishme, sipas meteorologëve. Kur erërat janë të forta, ato qëndrojnë në vend, por kur erërat dobësohen, vorbulla lëviz më në jug dhe ajri i ftohtë ulet drejt SHBA-së. Ndërsa ajri i ftohtë takohet me ajrin e butë në jug, ajri ngrihet dhe formohen fronte stuhie.
