Ipswich Town, në garë për ngjitjen në kategori, ka firmosur me anësorin Anis Mehmeti nga rivalët e Championship, Bristol City, për një shumë të pazbuluar, që raportohet të jetë fillimisht 3 milionë paund. 25-vjeçari i bashkohet “Blues” me një kontratë deri në verën e vitit 2029.
Sulmuesi i lindur në Londër, ndërkombëtar i Shqipërisë, ka shënuar nëntë gola në 31 paraqitje për “Robins” këtë sezon. Ai luajti në barazimin 1-1 me Ipswich në Ashton Gate në shtator dhe në fitoren 2-0 të “Tractor Boys” në ndeshjen e kthimit më herët këtë javë. Mehmeti ishte golashënuesi më i mirë i City sezonin e kaluar me 12 gola dhe iu ofrua një kontratë e re në tetor, me atë ekzistuesen që i skadonte këtë verë.
Një sulmues i gjithanshëm, Anis transferohet në Portman Road pasi ka shënuar tetë gola dhe ka dhënë gjashtë asist në gjysmën e parë të sezonit 2025/26 në Sky Bet Championship. Pas përfundimit të transferimit, Anis do të mbajë fanellën me numrin 33 për Town.
BREAKING: Bristol City's Anis Mehmeti has passed a medical with Ipswich Town 🚨
The 25-year-old midfielder has agreed terms on a 3-and-a-half year contract 🔵 pic.twitter.com/bB6kSBmfte
— Sky Sports News (@SkySportsNews) January 23, 2026
Fjalët e para si lojtar i Ipswich
“Jam shumë i emocionuar që kam firmosur për këtë klub”, tha Anis. “Gjithçka që klubi po përpiqet të arrijë përputhet me ambiciet e mia dhe flet vetë. Tifozët janë të mrekullueshëm dhe mezi pres të luaj para tyre. Jam një lojtar i uritur me dëshirë për të fituar dhe dua të shënoj gola, të jap asist dhe të bëj gjithçka që mundem për të ndihmuar skuadrën. Të gjithë e dinë që ambicia është të rikthehemi në Premier League dhe unë jam këtu për të ndihmuar që ta arrijmë këtë.”
Kush është Anis Mehmeti
Pasi ka kaluar kohë në akademitë e Fulham dhe Tottenham, Anis u transferua te Norwich City në korrik 2017 përpara një periudhe në kategoritë jo-profesionale me Woodford Town. Më pas iu bashkua Wycombe Wanderers në vitin 2020, duke bërë gjithsej 97 paraqitje për “Chairboys” dhe duke shënuar 19 gola, përpara se të transferohej te Bristol City në vitin 2023.
Gjatë kohës në Ashton Gate, Anis zhvilloi 136 ndeshje dhe shënoi 26 gola, duke ndihmuar skuadrën e tij të arrinte playoff-et e Championship në sezonin 2024/25. Ai ka tre paraqitje me kombëtaren e parë të Shqipërisë, pasi ka përfaqësuar vendin edhe në nivele të ndryshme të moshave. Prej kohësh Mehmeti anashkalohet nga Sylvinho, që tani duhet të mendohet mirë para se të bëjë zgjedhjet e tij për ndeshjet e playoff-it të Botërorit në mars, fillimisht kundër Polonisë e pastaj, në rast kalimi, kundër fitueses së çiftit Ukrainë-Suedi.
