Tifozët e Arsenal i thanë Viktor Gyokeres të “përgatiste valixhet” pasi panë Gabriel Jesus të shënonte një dygolësh kundër Interit – por suedezi i heshti kritikët duke shënuar një gol fantastik, si zëvendësues. Sulmuesi suedez ishte parashikuar për madhështi kur mbërriti në Emirates në verë për 63.5 milionë paund.
Kjo ndodhi pasi kishte shënuar 54 gola në 52 ndeshje për Sporting Lisbonën, më shumë se çdo sulmues në pesë ligat kryesore europiane. Por Gyokeres ka pasur vështirësi të përshtatet me jetën në Londrën e Veriut, duke shënuar vetëm pesë gola në Premier League në 20 paraqitje. Para ndeshjes kundër Interit, ai kishte vetëm një gol në dhjetë ndeshjet e fundit në kampionat. Jesus u rikthye vetëm muajin e kaluar nga një dëmtim i rëndë ACL dhe shënoi në fitoren 4-1 ndaj Aston Villa në fund të vitit 2025.
Dhe pasi panë ish-yllin e Man City të shënonte dy gola të bukur kundër skuadrës së Serie A, disa tifozë shpërthyen duke pretenduar se Gyokeres ishte “i mbaruar” te klubi. Njëri shkroi në X: “Gyokeres, përgatis valixhet.” Një tjetër tha: “Gjithçka ka mbaruar për Gyokeres.” Një i tretë shtoi: “Jesus është shumë më i mirë se Gyokeres.” Dhe një tjetër komentoi: “Gyokeres ka mbaruar.”
Gyokeres e nisi ndeshjen në stol në San Siro, me Jesus që udhëhoqi sulmin përkrah Bukayo Saka dhe Leandro Trossard. Por pasi u hodh në fushë si zëvendësues, ai i la pas kritikët duke harkuar një goditje të mrekullueshme për të shënuar golin e tretë të Arsenalit për 3-1. Gyokeres ishte titullar në barazimin 0-0 të Arsenalit kundër Nottingham Forest të dielën, por u zëvendësua pas vetëm 57 minutash pasi nuk arriti të rrezikonte ekipin që lufton për mbijetesë. Ai shënoi dhe asistoi në fitoren 3-2 kundër Chelseat në Kupën e Ligës javën e kaluar. Jesus zbuloi këtë javë se kishte folur me Gyokeres për t’i dhënë këshilla dhe pranoi se “nuk ishte e lehtë” për ardhjen e re.
Fjalët e teknikut Arteta
Trajneri Mikel Arteta u pyet për vështirësitë e Gyokeres para ndeshjes me Interin dhe doli në mbrojtje të lojtarit. Spanjolli tha: “Mendoj se kjo vlen për të gjithë numrat nëntë në ligë dhe sa e vështirë është të luash atë pozicion sot. Me fizikalitetin, dominimin e mbrojtësve qendrorë dhe cilësinë e tyre, si edhe mungesën e hapësirave në shumicën e kohës gjatë ndeshjes për t’i shfrytëzuar. Por kjo ka të bëjë me vazhdimësinë, me të provuarit sërish. Ne e dimë normën e tij të punës, ai po përpiqet vërtet të japë maksimumin dhe duhet të vazhdojmë të punojmë.”
