Reshjet intensive të shiut që kanë përfshirë veriun e vendit gjatë ditëve të fundit po e çojnë me shpejtësi drejt mbushjes maksimale Liqenin e Kukësit, ujëmbledhësin më të madh në Shqipëri.
Me ritmet aktuale të prurjeve, niveli i ujit po i afrohet shpejt kuotës maksimale, duke rritur mundësinë e shkarkimeve të detyruara nga diga e Fierzës.
Sipas të dhënave teknike, vetëm në katër ditë niveli i ujit në liqen është rritur me rreth 11 metra, ndërsa prurjet në lumin Drin janë shumëfishuar. Nga 260 m³/s para reshjeve, aktualisht prurjet kanë arritur në 1200 m³/s në HEC Fierzë, një fluks që ushtron presion të vazhdueshëm mbi rezervuarin.
👉 Niveli aktual i ujit në Liqenin e Kukësit:
HEC Fierzë: 290.8 metra
(Niveli maksimal: 296 metra)
Me këtë trend, ekspertët paralajmërojnë se brenda dy ditëve mund të arrihet kuota maksimale e ujit, çka do të impononte nevojën për menaxhim të kontrolluar të shkarkimeve për të garantuar sigurinë e digës.
Fierzë, nyja kyçe e Kaskadës së Drinit, ka një rol vendimtar edhe për dy hidrocentralet e tjera në vijim, atë të Komanit dhe Vaut të Dejës. Çdo shkarkim i shtuar nga Fierzë do të transmetohej menjëherë në këto diga, duke krijuar një efekt domino në të gjithë kaskadën.
Rritja e menjëhershme e prurjeve në Koman dhe Vaun e Dejës do të rriste ndjeshëm rrezikun e përmbytjeve në zonat poshtë digave, veçanërisht në zonat e nënshkodrës, të cilat historikisht janë të ekspozuara ndaj përmbytjeve në raste të tilla.
Ndaj, situata po monitorohet në mënyrë të vazhdueshme nga ekspertët e HEC-it të Fierzës dhe strukturat përgjegjëse, me qëllim balancimin midis ruajtjes së sigurisë së digave, prodhimit të energjisë elektrike dhe minimizimit të rrezikut për përmbytje në zonat e ulëta.
