Napoli mposhti Milanin me rezultatin 2-0 në gjysmëfinalen e Superkupës së Italisë. Kuqezinjtë sigurojnë kualifikimin në finalen e madhe që do të zhvillohet të hënën, më 22 dhjetor. Sfida u luajt në “King Saud University Stadium” në Riad.
Pjesa e parë: Napoli godet me Neres
Napoli e nisi mirë ndeshjen, por ishte Milani ai që mori kontrollin e lojës. “Djalli” ndërtoi aksione dhe u shfaq disa herë rrezikshëm pranë portës së Milinković-Savić. Kuqezinjtë krijuan disa raste për shënim, por pa arritur të konkretizojnë.
Në minutën e 39-të, skuadra e Contes kaloi në avantazh. David Neres përfitoi nga një asist i Hojlund, i cili i shpëtoi mbulimit të De Winter, dhe e dërgoi topin në rrjetë.
Në fundin e pjesës së parë, Hojlund ishte shumë pranë golit të dytë pas një kundërsulmi të shpejtë së bashku me Elmas. Por Maignan reagoi shkëlqyeshëm, duke kuptuar goditjen në shtyllën e parë dhe duke e devijuar topin në këndore.
Pjesa e dytë: Hojlund vulos fitoren
Në fraksionin e dytë të lojës, Napoli u afrua sërish te goli me një goditje të fuqishme të Rrahmanit. Por Maignan bëri një pritje vendimtare, duke e larguar topin pothuajse nga trekëndëshi i portës. Më pas, Milani u hodh në sulm.
Në kërkim të barazimit, skuadra e Allegrit u bë më agresive dhe këmbëngulëse në zotërimin e topit, duke tentuar të çajë mbrojtjen e kampionëve të Italisë. Megjithatë, në minutën e 64-t, Napoli goditi sërish. Hojlund sulmoi mirë thellësinë, kaloi De Winter dhe goditi fuqishëm duke e mposhtur Maignan me një diagonale të saktë.
Milani provoi të reagojë me Fofanën, i sapo futur në lojë, por pa e vënë realisht në vështirësi Milinković-Savić. Rasti për golin e tretë i ra McTominay-t, por mesfushori skocez e dërgoi topin mbi portë.
Finalja më 22 dhjetor
Në fund, pavarësisht presionit të fundit nga kuqezinjtë, Napoli e mbylli ndeshjen me fitore 2-0. Antonio Conte mposhti Massimiliano Allegrin dhe siguroi finalen e Superkupës së Italisë. Më 22 dhjetor Napoli do të përballet me fituesin e ndeshjes mes Bolognës dhe Interit.
