Donald Trump tha këtë të martë se së shpejti do të fillojë sulmet ndaj objektivave brenda Venezuelës. “Ne do të fillojmë të kryejmë këto sulme edhe në tokë”, – tha ai gjatë një takimi të kabinetit. Ai madje shtoi se “ne e dimë se ku jetojnë ata, ne e dimë se ku jetojnë të këqijtë dhe do të fillojmë shumë shpejt. Këta njerëz vranë mbi 200 000 njerëz vitin e kaluar”, pohoi presidenti amerikan, duke shtuar se “ne do t’i shtypim këta bastardë”.
Ai shënjestroi gjithashtu edhe Kolumbinë, një vend me të cilin SHBA-të kanë marrëdhënie qartësisht më të mira se Venezuela, për sulme të mundshme në të ardhmen. Ai tha se vendi “prodhon kokainë” dhe ua shet atë Shteteve të Bashkuara, kështu që kjo do të thotë se sulmet mund të kryhen edhe në tokën e saj.
Presidenti amerikan po përshkallëzon kështu qëndrimin e tij kundër trafikantëve të drogës, të cilët Uashingtoni thotë se duhet të largohen nga Venezuela. CNN raportoi se Trump ka qenë duke shqyrtuar goditjen e objektivave brenda Venezuelës për javë të tëra. Komentet vijnë pas atyre të një jave më parë kur u tha anëtarëve të ushtrisë gjatë një telefonate për Ditën e Falënderimeve se përpjekjet për të nisur sulme tokësore “do të fillojnë shumë shpejt”.
Por përveç mospajtimit publik mbi mundësinë e një lloji tjetër ndërhyrjeje në Venezuelë, taktikat e Departamentit të Luftës janë kritikuar ashpër. Pentagoni raportoi kohët e fundit se kreu një sulm të dytë ndaj një anijeje pasi sulmi fillestar dështoi të vriste të gjithë ata që ishin në bord. Trump i mbrojti veprimet, duke argumentuar se fushata ishte e nevojshme për të mbajtur drogën larg Shteteve të Bashkuara. “Kushdo që shet drogë në vendin tonë është subjekt i sulmit”, – tha Trump.
