Champions League është impresionuese në mbrëmjen e të mërkurës me rezultate spektakolare e me vetëm një skuadër me pikë të plota pas 5 ndeshjeve: Arsenal. Londinezët thyejnë 3-1 Bayern, I dënuar edhe nga gafat e Neuer. Inter mposhtet në Metropolitano, ndërsa PSG bën përmbysjen e madhe ndaj Tottenham. Turpërohet Liverpool, I mposhtur 1-4 në Anfield Road nga PSV e tani pankina e Slot është më e lëkundur se kurrë.
ARSENAL-BAYERN MUNICH 3-1
Emirates shërben si sfondi i ndeshjes së madhe mes Arsenal dhe Bayern Munich, dy prej klubeve më të mirë të Europës në këtë moment. Formacionet studiojnë njëra-tjetrën në fillim të ndeshjes dhe në minutën e 22-të “Gunners” godasin të parët: Timber godet me kokë në këndoren e Saka-s dhe bën 1-0, duke shfrytëzuar specialitetin e shtëpisë, pra goditjet standarte. Bayern e pësoi goditjen dhe në 32’ përgjigjet: një top i gjatë ndriçues i Kimmich, devijim me vole nga Gnabry dhe gol i talentit Karl.
Arsenal flirtoi disa herë me 2-1 në pjesën e dytë dhe në 69’ e gjen atë: në shtyllën e dytë shënoi Madueke, që i jep vlerë kështu topit të radhës të rikuperuar nga Rice dhe pastaj të krosuar nga Calafiori. Është një avantazh i merituar për londinezët, të cilët në minutën e 77’ ngjiten madje në 3-1: Neuer bën një gabim të rëndë në dalje dhe Martinelli e dërgon topin në rrjetë me golin që i jep fund takimit. Në rikthimin nga dëmtimi, braziliani lë menjëherë shenjë dhe e çon Arsenal në kuotën e 15 pikëve: djemtë e teknikut Arteta janë të vetmit ende me pikë të plota. Bayern Munich pëson ndërkohë humbjen e parë sezonale dhe mbetet në 12 pikë.
LIVERPOOL-PSV 1-4
Në vështirësi të madhe në Premier League, Liverpool zbret në fushë në Champions League me dëshirën për t’u rikthyer te rezultatet pozitive. Fillimi në “Anfield” është megjithatë i tëri në disavantazh: në minutën e 6-të arbitri ndëshkon një prekje të dukshme të topit me dorë në zonë nga van Dijk dhe Perisic e çon PSV-në në 1-0 nga pika e bardhë. Reagimi i “Reds” nuk vonon: për 1-1 në minutën e 16’ shënon Szoboszlai, pas pritjes së Kovar mbi goditjen fillestare të Gakpo. Anglezët vuajnë goditjet standarte të kundërshtarëve dhe Gasiorowski arrin ta mposhtë sërish Mamardashvilin në 20’: por pozicioni i tij është qartazi jashtë loje dhe goli nuk vlen. Van Dijk godet traversën në 32’, ndërsa Til bën 2-1 për PSV në 56’: shumë i bukur asistimi në thellësi i Mauro Junior.
Liverpool sheh fantazmat dhe në minutën e 73’ goditet edhe nga 3-1 i Driouech: i tmerrshëm gabimi difensiv i Konaté, i ndihmuar pak edhe nga shokët e skuadrës. Për ta bërë edhe më të ëmbël suksesin e PSV-së në Anfield vjen 4-1 i Driouech në 92’. Hollandezët shkojnë kështu në kuotën e 8 pikëve, ndërsa Liverpool mbetet në 9 pikë, duke u dorëzuar para humbjes së nëntë në total në dymbëdhjetë ndeshjet e fundit mes kupës dhe kampionatit.
OLYMPIACOS-REAL MADRID 3-4
Real Madrid ndalet në Athinë për ndeshjen ndaj Olympiacos dhe në minutën e 8’ gjendet menjëherë në ndjekje: vendasit ndërtojnë një aksion të mrekullueshëm me një seri pasimesh të para dhe Chiquinho e finalizon në mënyrën më të mirë, duke mposhtur Lunin. Baraspeshën në minutën e 22’ e vendos i zakonshmi Mbappé, i zoti të shfrytëzojë një hapësirë të madhe në mbrojtjen greke dhe të firmosë 1-1. Kalojnë dy minuta dhe francezi dyfishon me kokë, duke përmbysur ndeshjen në një çast. Ish-lojtari i PSG nuk është ende i kënaqur dhe në 29’ realizon edhe 3-1, duke u bërë protagonist i një triplete në shtatë minuta.
Vinicius shënon më pas në minutën e 32’, por goli i brazilianit anulohet për pozicion jashtë loje. Është gjithçka në rregull në minutën e 52’, kur ish-lojtari i Inter, Taremi, ngushtoi diferencën në 3-2 me një goditje të bukur me kokë. Rezultati i ri nuk i pëlqen fare Mbappé, që sheh të arsyeshme të shënojë edhe të katërtin personal dhe të skuadrës në minutën e 60’, duke shkuar tashmë në 9 gola në këtë Champions League. Në festën e golave dëshiron të marrë pjesë edhe El Kaabi dhe ish-lojtari i Como, Strefezza, e plotëson, duke i shërbyer assistin që marokeni e shndërroi në 4-3 në minutën e 81’. Është rezultati final, pavarësisht se grekët i afrohen madje edhe barazimit. Real Madrid ngjitet kështu në 12 pikë, ndërsa Olympiacos qëndron në 2.
PSG-TOTTENHAM 5-3
Java e pestë e Champions League riktheu sfidën që në verë vlejti Superkupën e Europës në Udine. PSG priti Tottenham në Parc des Princes, ku ishin miqtë ata që kaluan në 1-0 në minutën e 35’: Richarlison i parapriu Marquinhos me kokë në qendër të zonës dhe finalizoi me një goditje të saktë një aksion të mrekullueshëm të vizatuar nga skuadra e Thomas Frank. Në minutën e fundit të pjesës së parë parisienët gjejnë megjithatë 1-1 e papritur: e realizoi Vitinha me një goditje të fuqishme me të djathtën, që goditi traversën dhe futet në rrjetë pas shpinës së Vicarios në 45’.
Tottenham nuk dorëzohet dhe në fillimin e pjesës së dytë rikthehet përpara: 2-1 në 50’ mban firmën e ish-juventinit, Kolo Muani, i shpejtë për të shtyrë në rrjetë pas shpëtimit fillestar të Pacho në vijë. Reagimi i PSG kësaj here është i menjëhershëm: Vitinha gjen dygolëshin personal në minutën e 53’. Spurs e ndjejnë goditjen dhe në të 59’ pësojnë madje edhe 3-2 nga Fabian Ruiz: vendimtar në këtë rast është rikuperimi i topit nga Lucas Hernandez. Emocionet nuk kanë përfunduar: Pacho në 63’ dhe Kolo Muani në 72’ e çojnë rezultatin në 4-3. Si të mos mjaftonte, Vitinha shënon sërish me penallti në 77’, duke bërë tripletën dhe fiksuar 5-3 përfundimtar për PSG. Kampionët në fuqi të Europës, që e mbyllin me dhjetë lojtarë për kartonin e kuq ndaj Lucas Hernandez (bërryl ndaj Xavi Simons në 93’), ngjiten në 12 pikë; Spurs ndalen në 8 pikë.
SPORTING LISBONA-BRUGES 3-0
Sporting mirëpret Bruges në Estadio José Alvalade, stadium ku momenti i parë i madh vjen në minutën e 9’: arbitri tregon një karton të kuq direkt për Hjulmand për një faull me këmbë të ngritur ndaj Stankovic, por VAR e thërret dhe drejtuesi i ndeshjes ndryshon ngjyrën e kartonit në të verdhë. Ish-lojtari i Lecce qëndron kështu në fushë dhe prej aty asiston golin e Quenda, që zhbllokon rezultatin për luzitanët në minutën e 24’. Suarez shënon ndërkohë dyfishimin në 32’, me kolumbianin që godet gjithashtu një shtyllë në fillim të pjesës së dytë. Për të bërë 3-0 është Trincao në 70’, me Sporting Lisbonën që shkon në 10 pikë. Bruges mbetet në 4.
ATLETICO MADRID-INTER 2-1
Në ditën e pestë të fazës së kampionatit të Champions League, Interi humbet 2-1 në Metropolitano kundër Atletico Madrid dhe pëson humbjen e parë në Europë. Të zinjve-blu ua kushtëzon ndeshjen një goditje me kokë nga Gimenez në minutën e 93-të, kur rezultati dukej tashmë i ngrirë. Fillim i mirë i zikaltërve (dy raste të dyfishta për Dimarco), por janë Colchoneros që kalojnë përpara në minutën e 9-të me një devijim të Julian Alvarez: arbitri nuk e konfirmon, por kthehet pas duke mos konstatuar një prekje me dorë nga Baena. Në minutën e 54-t, Zielinski kombinon me Bonny dhe gjen barazimin e merituar para befasimit final. Interi mbetet me 12 pikë në vendin e 4-t, Atletico ngjitet në 9.
EINTRACHT FRANKFURT-ATALANTA 0-3
E mbarë e para për Palladino në Champions League. Në ditën e pestë të League Phase, Atalanta mund 3-0 Eintracht Frankfurt dhe konsolidon pozicionin në renditje duke u ngjitur në kuotën 10 pikë, pranë Top8. Në Waldstadion, në pjesën e parë ritme të larta, shumë presion dhe dy shtylla të bujshme nga Lookman dhe Scamacca. Në pjesën e dytë pastaj, Dea ndryshon ritëm, rrit intensitetin mes linjave dhe pas një ore loje mbyll gjithçka brenda pesë minutash falë golave të Lookman (60’), Ederson (62’) dhe De Ketelaere (65’).
COPENHAGEN-KAIRAT ALMATY 3-2
Copenhagen pret Kairat Almaty në Parken-in e zjarrtë, ku danezët kalojnë përpara në minutën e 26′ falë një goditjeje me kokë nga afër të Dadason, i shërbyer nga Robert. Vendasit mbyllin kështu në avantazh pjesën e parë, por në minutën e 53′ rrezikojnë të pësojnë barazimin: vetëm traversa i mohon golin Tapalov. Për të zgjeruar diferencën në favor të formacionit të Neestrup mendojnë pastaj Larsson me penallti në minutën e 59′ dhe Robert me një goditje nga distanca (e devijuar) në minutën e 73′. Kazakët duken të dorëzuar, por Satpaev shënon në minutën e 81′, duke shfrytëzuar një gjumë të pabesueshëm të Kotarski, ndërsa Baybek ngushton madje në 3-2 në minutën e 90-të. Përmbysja e miqve ndalet megjithatë këtu. Edhe pse dridhet në fund, Copenhagen siguron fitoren e parë në Champions dhe ngjitet në 4 pikë, ndërsa Kairat Almaty mbetet në 1.
PAFOS-MONACO 2-2
Pafos-Monaco luhet në Alphamega Stadium të Limassol dhe sheh miqtë të hapin ndeshjen që në minutën e 5′: për të shënuar 1-0 mendon Minamino me një diagonale të bukur, mbi asist të Akliouche. Në minutën e 18′ vjen megjithatë përgjigjja e vendasve: Orsic gjuan një goditje këndi dhe David Luiz godet me kokë në rrjetë për 1-1, me një kërcim të fuqishëm. Baraspesha e re zgjat pak: në minutën e 26-të Michail gabon në ndërtimin nga prapa dhe i dhuron topin Balogun, i cili përfiton nga dhurata dhe shënon 2-1. Monegaskët përpiqen kështu të menaxhojnë avantazhin në pjesën e dytë, por në minutën e 88-të pësojnë 2-2: vendimtar është autogoli i Salisu, mbi goditjen e Sunjic. Barazimi i çon si Pafosin ashtu edhe Monacon në 6 pikë, me Pogba që, pasi është rikthyer në fushë në Ligue 1, këtë herë e ndjek ndeshjen tërësisht nga stoli.
Champions League – League Stage
FC Copenhagen 3-2 Kairat Almaty
Pafos FC 2-2 AS Monaco
Arsenal 3-1 Bayern Munich
Atletico Madrid 2-1 Inter
Eintracht Frankfurt 0-3 Atalanta
Liverpool 1-4 PSV Eindhoven
Olympiacos 3-4 Real Madrid
Paris Saint-Germain 5-3 Tottenham Hotspur
Sporting CP 3-0 Club Brugge
