Tekniku i Kombëtares Sylvinho ka shtuar numrin e lojtarëve të seleksionuar për dy ndeshjet e fundit kualifikuese, në krahasim me ato të grumbulluar në tetor, por sërisht ka lënë jashtë Anis Mehmetin dhe Ernest Muçin. Tekniku brazilian ka publikuar listën e lojtarëve të përzgjedhur për dy ndeshjet e fundit kualifikuese të Kupës së Botës 2026 ndaj Andorrës dhe Anglisë, ku synohet kualifikimi në playoff të Kupës së Botës.
Tekniku kuqezi ka përzgjedhur 25 futbollistë për dy ndeshjet e fundit kualifikuese. Asnjë ndryshim nga të përzgjedhurit e një muaji më parë kundër Serbisë dhe Jordanisë, por këtë herë janë rithirrur edhe Indrit Tuci, që mungonte nga kohët e Nations League dhe Adrion Pajaziti, që në tetor ishte i dëmtuar. Të tjerët janë të gjithë aty, nga kapiteni Gjimshiti, te Hysaj e Mitaj. Në mesfushë dy lojtarët e Lecce Berisha e Ramadani, por edhe të zakonshmit Asllani, Laçi e Bajrami.
Grumbullimi i Kombëtares nis të hënën, më 10 nëntor, në Barcelonë, ku kuqezinjtë do të përgatiten për ndeshjen ndaj Andorrës, e cila do të luhet më 13 nëntor në stadiumin “Estadi FAF Encamp”, në orën 20:45. Sfida e fundit e kuqezinjve në këto kualifikuese do të zhvillohet më 16 nëntor, në stadiumin “Air Albania”, ndaj Anglisë, në orën 18:00.
⚽ Lista e Kombëtares për ndeshjet kundër Andorrës dhe Anglisë, më ️ 13 dhe 16 nëntor#ForcaShqiperi #Kombetarja pic.twitter.com/A4tU8McfEg
— FSHF (@FSHForg) November 7, 2025
Lista e plotë:
Portierë: Thomas Strakosha, Mario Dajsinani, Simon Simoni
Mbrojtës: Elseid Hysaj, Ivan Balliu, Mario Mitaj, Naser Aliji, Ardian Ismajli, Berat Gjimshiti, Arlind Ajeti, Klisman Cake
Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Jasir Asani
Sulmues: Armando Broja, Myrto Uzuni, Rey Manaj, Mirlind Daku, Indrit Tuci
