Vrasja e gjyqtarit Astrit Kalaja ka bërë jehonë në të gjitha mediat prestigjioze ndërkombëtare. “Një burrë në gjyq hapi zjarr në një sallë gjyqi në kryeqytetin e Shqipërisë, Tiranë, duke vrarë gjyqtarin dhe duke plagosur dy persona të tjerë” – shkruan The Guardian.
“Pala tjetër në gjyq, një baba dhe bir, u qëlluan gjithashtu dhe u dërguan në spital, por ishin në gjendje të qëndrueshme. Sipas raporteve të shtypit lokal, çështja kishte të bënte me një mosmarrëveshje pronësie” – citohet në shkrim.
“Gjyqtari Astrit Kalaja u qëllua brenda sallës së gjyqit nga një i dyshuar 30-vjeçar me inicialet E. Sh., sipas policisë. Kalaja vdiq ndërsa po transportohej në spital. Policia tha se personi i armatosur qëlloi edhe dy persona të tjerë të përfshirë në seancë dëgjimore.
Lëndimet e tyre nuk ishin kërcënuese për jetën. Pas reformave të gjithanshme gjyqësore të nisura në vitin 2016 me mbështetjen e Bashkimit Evropian dhe SHBA-së, dhjetëra mijëra raste gjyqësore janë vonuar për vite me radhë” – citon CNN.
“Astrit Kalaja po kryesonte seancën dëgjimore kur burri nxori një armë dhe e qëlloi. Gjyqtari u dërgua me urgjencë në spital, por vdiq gjatë rrugës nga plagët e marra” – citon francezja Le Monde.
“Sipas të dhënave nga Qendra e Dokumentacionit të Evropës Juglindore dhe Lindore për Luftimin e Përhapjes së Armëve të Vogla dhe të Lehta (Seesac), 213 incidente që përfshijnë armë zjarri u regjistruan në Shqipëri midis janarit dhe qershorit 2025” – citon gazeta franceze.
“Autoritetet nuk kanë dhënë detaje rreth motivit apo natyrës së çështjes që po dëgjohet. Çështja e gjetur në faqen e internetit të gjykatës i referohej një prone” – citon grekja Kathimerini.
