Në javën e dytë të Kategorisë Superiore, “Arena e Demave” priti një përballje që pritej të sillte emocione, por Partizani dhe Teuta u ndalën në një barazim pa gola, që la më shumë pikëpyetje sesa përgjigje për gjendjen reale të dy skuadrave.
Një ndeshje e kujdesshme dhe pa fantazi
Që nga minutat e para u pa qartë se asnjëra prej ekipeve nuk donte të rrezikonte tepër. Partizani mbajti më shumë topin (rreth 58% posedim), por nuk arriti të krijojë raste të pastra shënimi. Nga ana tjetër, Teuta u përqendrua në organizimin mbrojtës dhe kërkoi kundërsulmin, por pa konkretizuar. Në të gjithë ndeshjen, të dyja skuadrat regjistruan vetëm 3 goditje në kuadrat, një shifër që tregon mungesën e qartësisë në sulm.
Më shumë se për lojën, dueli do të mbahet mend për dëmtimet: mbrojtësi Sembene u largua i pari nga fusha për Partizanin, ndërsa pak më vonë edhe Jazxhi i Teutës, duke shtuar presionin mbi stafet mjekësore të të dy klubeve.
Reagimi i Milinković: “Nuk mund të luftosh për titull pa gola”
Pas barazimit, trajneri i Partizanit, Mladen Milinković, nuk e fshehu zhgënjimin. “Kur luan në shtëpi dhe nuk fiton, është e vështirë të gëzohesh. Nuk ishim kreativë dhe duhet ta pranoj që nuk ishte një ndeshje e bukur. Pozitive mbetet fakti që mbajtëm portën e paprekur. Por, për të fituar titullin, duhet të shënosh. Skuka nuk është në formën më të mirë, Bintsouka nuk është ende gati dhe ne nuk kemi një sulmues tipik. Ky është një problem që duhet ta zgjidhim shpejt.”
Lexo më tej: Penallti e humbur, gol i anuluar e tre të kuq: Egnatia e Elbasani, 1-1 mes polemikave
Tekniku serb shtoi se preferoi të shmangte rreziqet, duke qenë se kishte pak informacion mbi versionin e ri të Teutës, por premtoi se ky nuk do të jetë stili i zakonshëm i lojës së Partizanit gjatë sezonit.
Dobi: “Ekipi është ende në themele, por treguam personalitet”
Në anën tjetër, trajneri debutues i Teutës, Enkelejd Dobi, e pa barazimin si një hap të parë në rrugën e gjatë të ndërtimit të skuadrës. “Në një muaj e gjysmë nuk mund të presësh që Teuta të jetë gati. Ekipi është ende në themele, por më pëlqeu që treguam personalitet dhe nuk e lamë Partizanin të na dominonte. Kishim momente të mira, sidomos në pjesën e dytë, ku pas tranzicioneve mund të kërkonim më shumë. Do kohë, disiplinë dhe vazhdimësi për të çuar këtë projekt aty ku duhet.”
Dobi nënvizoi se Teuta e tij do të ketë një stil ndryshe nga versionet e mëparshme të skuadrës, me më shumë presion të lartë dhe kërkim ekuilibri sipas kundërshtarit.
Çfarë pritet më tej
Pas këtij rezultati, Partizani ngjitet në kuotën e katër pikëve pas fitores së parë me Vorën, por lë shije të hidhur, sidomos duke qenë se luajti para tifozëve të vet. Në javën e tretë e pret një sfidë delikate në transfertë kundër Vllaznisë, që mund të japë më shumë tregues për pretendimet e kuqve.
Teuta nga ana tjetër arkëton pikën e parë sezonale dhe tashmë ka një kalendar të ngjeshur përpara: më 5 shtator do të luajë ndeshjen e prapambetur ndaj Dinamos, përpara se të presë Vorën në Durrës. Për dobianët, këto sfida do të shërbejnë si test real për të parë sesa shpejt skuadra e re po fiton identitetin e kërkuar nga trajneri.
