Disa futbollistë të Premier League janë akuzuar se kanë trukuar ndeshje nga Fredrik Gardare, ish-shef i një njësie të specializuar në luftën kundër kriminalitetit ndërkombëtar. Bëhet fjalë për një zbulim që ka shkaktuar një farë habie dhe që po diskutohet shumë në Angli.
Gardare, i cili në të kaluarën ka drejtuar një skuadër të policisë suedeze të angazhuar në hetime mbi kriminalitetin e organizuar të infiltruar në sport, pohon se gjatë një bastisjeje në një kazino të paligjshme në vitin 2021 kishte nxjerrë në pah prova që janë injoruar: ditët e fundit ai ka bërë disa pohime befasuese në një raport të ri, duke deklaruar se gjatë bastisjes u konfiskuan disa telefona celularë dhe se një në veçanti do të kishte përmbajtur “prova të plota” në aplikacionin e mesazheve Telegram të lojtarëve që bashkëpunonin me një kriminel për të trukuar ndeshje në gjithë Europën, përfshirë Nations League.
Lojtarë të Premier League akuzohen për trukim ndeshjesh në gjithë Europën
Duke folur për tabloidin britanik Daily Mail, Fredrik Gardare ka pohuar se ai zbulim ishte rasti më i “qartë” i korrupsionit që ai ka parë ndonjëherë në karrierën e tij, duke shtuar se “nuk ka asgjë më të qartë” se ajo që u gjet në një telefon të sekuestruar: “Ishte më shumë se një lojtar i Premier League (i gjetur në telefon). Ai vinte baste për kartonë të verdhë, goditje këndi dhe aspekte të tjera të ndeshjeve. Ai telefon është në duart e policisë së Stokholmit”.
Gardare, i cili mendon se autoritetet kompetente duhej të kishin ndërhyrë menjëherë mbi provat, tani do të dijë pse ato janë arkivuar: “Për mua ishte një prioritet absolut, i ngarkova gjithë skuadrës sime hetimin. Por në të njëjtën kohë, në dhjetor të atij viti, policia deklaroi: ‘E kemi mbyllur këtë çështje’. Ne gjithashtu ia dhamë informacionin direkt federatës së futbollit këtu në Suedi dhe thamë: ‘Është një gjë serioze’. Shpresojmë që ata të kenë kontaktuar federatën e futbollit anglez, por unë nuk e di.”
Ai shtoi: “Kjo është e rëndësishme si për futbollin suedez ashtu edhe për atë të vendeve të tjera. Është thelbësore që Anglia dhe futbolli ndërkombëtar t’i japin fund kombinimeve të vazhdueshme”.
Mes rasteve të ndjekura nga Fredrik Gardare bën pjesë edhe një hetim 18-mujor që zbuloi Dickson Etuhu, ish-mesfushor i Manchester City, në përpjekjen për të trukuar ndeshje në Suedi: futbollisti u shpall fajtor dhe u pezullua për pesë vjet në Suedi.
Përgjigjja e Federatës Suedeze: “Nuk mundnim të ndërhynim”
Johan Claesson, oficer integriteti i Federatës Suedeze të Futbollit, ka komentuar pohimet me këto fjalë: “Është e vërtetë që Federata Suedeze e Futbollit, në vitin 2021, ka marrë nga policia informacione të përgjithshme sipas të cilave ishin gjetur informacione mbi ndeshje të trukuara në nivel kombëtar dhe ndërkombëtar në një telefon pas një bastisjeje në një kazino të paligjshme, por informacionet që ne kemi marrë nuk përmbanin asnjë detaj (për shkak të sekretit të hetimeve policore në zhvillim) mbi të cilat të mundnim të ndërhynim”.
FA nuk ka marrë rezultatet e hetimit nga policia suedeze, por është e vendosur t’i vlerësojë ato për të kuptuar se për çfarë materiali bëhet fjalë dhe nëse ka informacione mbi të cilat mund të punohet dhe të ndërhyhet.
