Presidenti Donald Trump priti të hënën në Shtëpinë e Bardhë presidentin ukrainas Volodymyr Zelensky dhe disa liderë evropianë, në një përpjekje për të shtyrë përpara bisedimet për t’i dhënë fund luftës së Rusisë në Ukrainë. Takimi ishte i qetë, pa tensionet që shoqëruan vizitën e mëparshme të Zelensky-t në Uashington. E megjithatë ky takim nuk prodhoi asnjë marrëveshje konkrete.
Pjesa më e madhe e diskutimeve u përqendrua te garancia e sigurisë që do të merrte Ukraina nëse pranon një marrëveshje paqeje. Shtetet e Bashkuara dhe vendet evropiane po shqyrtojnë mundësinë për të ndërtuar një sistem të ngjashëm me Nenin 5 të NATO-s, ku çdo sulm ndaj Ukrainës do të konsiderohet si sulm ndaj të gjithëve. Kur u pyet për këtë, Trump u shpreh në mënyrë të paqartë, duke thënë “do t’i ndihmojmë” dhe se “do të jemi të përfshirë”. Në rrjetet sociale, ai e përshkroi takimin si “të frytshëm” dhe theksoi se garancitë do të ofroheshin nga vendet evropiane, në koordinim me SHBA-në.
Kancelari gjerman Friedrich Merz kërkoi që fillimisht të vendosej një armëpushim, përpara se të nisnin negociatat me Rusinë, por Trump nuk e mbështeti këtë propozim. Presidenti francez Emmanuel Macron u shfaq skeptik për sinqeritetin e Putinit. “Nuk jam i bindur që ai e do paqen,” tha ai.
Diplomaci me telefonatë
Në një moment gjatë takimit, Trump e ndërpreu diskutimin me liderët evropianë për të telefonuar personalisht presidentin rus Vladimir Putin. Pas bisedës, ai ftoi Zelensky-n dhe të tjerët në Zyrën Ovale për t’u treguar për çfarë kishin folur. Sipas presidentit të Finlandës, Alexander Stubb, Trump tha se ishte përpjekur të organizonte një takim të drejtpërdrejtë mes Zelensky-t dhe Putinit, ndoshta edhe një takim trepalësh me veten si ndërmjetës.
Nga pala ruse, këshilltari i lartë i Putinit, Yuri Ushakov, e përshkroi bisedën me Trump si “të sinqertë dhe shumë konstruktive”, me një gjuhë diplomatike që zakonisht tregon se palët nuk kanë rënë plotësisht dakord. Rusia dhe SHBA pritet të caktojnë negociatorë të rinj për të vazhduar bisedimet, por ende nuk është e qartë nëse vetë Putin do të pranojë të takohet me Zelensky-n. Ai nuk e ka përjashtuar një takim, por ka bërë të qartë se nuk e konsideron homologun ukrainas as legjitim, as të barabartë.
Ukraina do të blejë armë amerikane me vlerë 90 miliardë dollarë
Një pjesë e rëndësishme e takimit iu kushtua edhe çështjeve të mbrojtjes. Zelensky tha se Ukraina do të blejë armë amerikane me vlerë 90 miliardë dollarë, përmes një marrëveshjeje që do të kalojë përmes Evropës. Kontrata zyrtare ende nuk është nënshkruar, por marrëveshja e përfolur shihet si një hap i madh për të siguruar që Ukraina të ketë kapacitetet e nevojshme për t’u mbrojtur nëse, ose kur, arrihet një marrëveshje paqeje./ NEW YORK TIMES
