Ratko Mlladiç, ish-komandanti famëkeq serb i Bosnjës gjatë luftërave në ish-Jugosllavi nga viti 1992 deri në 1995, kishte kërkuar muajin e kaluar lirimin e parakohshëm nga burgu për arsye shëndetësore, duke deklaruar se i kishin mbetur vetëm disa muaj jetë. Por një gjykatë ndërkombëtare për krime lufte ka refuzuar kërkesën e tij për t’u liruar dhe për t’u kthyer në Serbi.
Gjykatësja Graciela Gatti Santana, pranë Mekanizmit Ndërkombëtar të Rezidual për Gjykatat Penale, institucioni që trajton çështjet e mbetura nga Tribunali për Krimet e Luftës në ish-Jugosllavi, deklaroi të martën se gjendja shëndetësore e Mlladiçit nuk plotësonte kriterin e një “sëmundjeje akute terminale” që nevojitet për lirimin e parakohshëm.
Mlladiç, i njohur si “Kasapi i Bosnjës”, është dënuar me burgim të përjetshëm në vitin 2017 për gjenocid, krime lufte dhe krime kundër njerëzimit. Kërkesa e tij për t’u liruar ishte depozituar më 3 qershor 2025, ku ai pretendonte se kishte mbetur me vetëm disa muaj jetë.
“E pranoj që gjendja aktuale e Mlladiçit, e cila kërkon varësi nga të tjerët për aktivitetet bazë të jetës së përditshme, është e brishtë,” tha gjykatësja Santana në një vendim prej 12 faqesh të publikuar në Hagë të martën.
“Megjithatë, Mlladiçi vijon të marrë kujdes të gjithanshëm dhe njerëzor, siç dëshmohet gjerësisht në raportet mjekësore. Të dhënat që kam në dispozicion tregojnë se rrethanat humanitare të jashtëzakonshme që Mlladiçi ka paraqitur si bazë për lirimin, nuk janë të mbështetura.”
Mlladiç, 83 vjeç, u dënua nga tribunali i OKB-së për ish-Jugosllavinë për rolin e tij në terrorizimin e popullatës civile gjatë rrethimit 43-mujor të kryeqytetit boshnjak, Sarajevës, dhe për masakrën e Srebrenicës më 1995.
Rreth 8,000 burra dhe djem myslimanë u masakruan në Srebrenicë nga forcat serbe të Bosnjës në korrik të atij viti. Gjenocidi i Srebrenicës ishte kulmi gjakatar i luftës në Bosnje, e cila shpërtheu gjatë shpërbërjes së Jugosllavisë, ndërsa serbët e Bosnjës përpiqeshin të krijonin zona të dominuara nga serbët përmes spastrimit etnik ndaj dy grupeve të tjera kryesore etnike të vendit – kroatëve dhe boshnjakëve myslimanë.
Deri në shpërthimin e luftës Rusi-Ukrainë, lufta e Bosnjës konsiderohej konflikti më i përgjakshëm në Europë që nga Lufta e Dytë Botërore. Avokatët e Mlladiçit kanë përshkruar prej kohësh gjendjen e tij si të sëmurë dhe të dobësuar. Në kërkesën më të fundit, ata pohonin se ai vuan nga një sëmundje e pashërueshme dhe se “jeta e tij e mbetur matet në muaj,” sipas një kërkese që është parë nga agjencia e lajmeve AFP.
