Merkatoja e Juventus po has vështirësi për të nisur. Në këtë muaj të parë të tratativave, shoqëria bardhezi ka lëvizur ngadalë në treg, pasi është në kërkim të një thesari për të investuar. Për momentin, megjithatë, drejtori i përgjithshëm Comolli ende nuk ka arritur të largojë lojtarët që janë për shitje, mes tyre Douglas Luiz, Vlahovic dhe Weah. Në mendjen e drejtuesit francez, shitjet e këtyre tre futbollistëve do t’i sillnin Juventus rreth 90 milionë euro për të investuar në merkato, me Kolo Muani që mbetet objektivi kryesor.
Situata e Douglas Luiz
Pasi mungoi në ditët e para të grumbullimit pa asnjë justifikim, dje Douglas Luiz u kthye në Torino dhe iu bashkua – pjesërisht – shokëve të skuadrës në seancën stërvitore të pasdites. Mesfushori brazilian kërkoi ndjesë ndaj drejtuesve, stafit dhe skuadrës, duke e mbyllur kështu çështjen. Shoqëria ka parashikuar një gjobë, e cila, sipas rregullave, përfshin një minimum prej 5% të pagës bruto mujore, rreth 38-40 mijë euro për brazilianin. Megjithatë, Douglas Luiz mbetet në merkato në pritje të një oferte nga Premier League.
Juventus e vlerëson atë 40 milionë euro dhe shpreson ta shesë përfundimisht. Si alternativë, bardhezinjtë do të pranonin edhe huazim me detyrim blerjeje, ndërsa për momentin mbetet e vështirë pista e huazimit me të drejtë blerjeje. Interesi i Everton, West Ham dhe Nottingham Forest është real, por ende asnjë nga këto tri skuadra nuk është hedhur në sulm. I vetmi tentativë për t’u shënuar është ajo e Fenerbahçes së Mourinhos, që u refuzua menjëherë nga mesfushori, i cili dëshiron të rikthehet në Premier League.
Weah, i ndërlikuar
Edhe shitja e Timothy Weah, për momentin, mbetet shumë e ndërlikuar. Ditët e fundit, agjenti i lojtarit, Badou Sambague, ka sulmuar rëndë shoqërinë bardhezi, për shkak të ngecjes së tratativës me Marseille. “Juventus është një klub fantastik, por sektori sportiv menaxhohet nga tre persona. Dy prej tyre kanë klas, i treti ende është në kërkim të vetes. Dy kërkojnë zgjidhje, njëri krijon probleme dhe këtë nuk mund ta lejojmë”, lexohet në deklaratën e agjentit.
Oferta e Marseille është për një huazim me detyrim blerjeje për 15 milionë euro (bashkë me bonuset), pak më e ulët krahasuar me atë të Nottingham Forest (20 milionë) disa javë më parë. Dallimi është se tani lojtari po shtyn për t’u bashkuar me De Zerbin në Francë: gjithçka mbetet e hapur, por për momentin situata është e ndërlikuar.
Vlahovic, shpëtimi mund të jetë Milan
Më në fund, për të përmbyllur triptikun e shitjeve të programuara nga Juve, është ajo e Dusan Vlahovic, tashmë në periferi të projektit bardhezi. Juventus shpreson të përfitojë 25-30 milionë euro nga shitja dhe numri 9, për momentin, nuk dëshiron të largohet, edhe nëse i duhet të presë skadencën natyrale të kontratës në vitin 2026. Pasi ka refuzuar ofertat e majme nga Arabia Saudite, Vlahovic pret një lëvizje nga Milani, që mund të vijë vetëm në fund të gushtit.
Ndërkohë, serbi stërvitet me shokët e skuadrës në JTC në pritje për të kuptuar të ardhmen e tij. Juventus, megjithatë, ka nxitim dhe në ditët në vijim do të përpiqet të përshpejtojë ndjeshëm në frontin e daljeve.
