Pesha e mbiemrit është bërë e papërballueshme. Cristian Totti, djali i ish-kapitenit verdhekuq dhe i Ilary Blasi, ka vendosur të tërhiqet nga futbolli i luajtur në vetëm 19 vjeç. “Po, po tërhiqem, e kam vendosur”, ka konfirmuar ai në një telefonatë me gazetën La Nuova Sardegna. Një zgjedhje që vjen në përfundim të një karriere të nisur me pritshmëri të mëdha dhe të përfunduar në anonimitetin e Serie D.
Përvoja e fundit i përket klubit Olbia, ku grumbulloi vetëm gjashtë paraqitje dhe 156 minuta në fushë. Më parë, një kalim në akademinë e Romës, Primavera e Frosinones dhe një periudhë të shkurtër në Spanjë me Rayo Vallecano, ku përfundoi në gazeta vetëm për një debat në rrugë me të ëmën.
Mbiemri i rëndë
Por më shumë se paraqitjet, ka rënduar ai mbiemër i rëndë. “Të jesh djali i Tottit ka ndikuar në vlerësimet”, ka pranuar Marco Amelia, ish-trajneri i tij te Olbia. “Për mua do të kishte pasur përpara një karrierë shumë të mirë në Serie C dhe Serie B”, ka shtuar ish-portieri i Kombëtares kampione bote në vitin 2006.
Në CV-në e tij si i ri: 2 paraqitje me U18 të Romës, 4 me Frosinone Primavera, një gol, por asnjëherë vazhdimësi. Në korrik 2024 firmosi me Avezzano-n, më pas tërheqja dhe kalimi te Olbia. Në dhjetor ndërprerja e kontratës dhe tani vendimi përfundimtar.
Në mes edhe një rast në rrjetet sociale. Pas debutimit në Kupën e Italisë, një video e shpërndarë online shkaktoi ofendime dhe body shaming të pajustifikuar. E akuzonin se ishte jashtë forme. Në realitet, fiziku ishte ai i një futbollisti normal të Serie D. Por me atë mbiemër, çdo detaj bëhet shënjestër.
Tani Totti Jr largohet nga fusha, por mbetet në botën e futbollit. Do të punojë në Totti Soccer School, themeluar nga i ati dhe e menaxhuar nga xhaxhai Riccardo, si vëzhgues i talenteve të rinj. Një rrugë e re, larg presionit të krahasimeve. “Nuk mund të them asgjë, por konfirmoj se po tërhiqem. Nuk do të luaj më futboll”, ka thënë ai. Sepse ndonjëherë një mbiemër që duhet të hapë dyer, përfundon duke i mbyllur ato.
