Gjykata e Fierit gjatë seancës së sotme ka marrë vendimin dhe ka caktuar masën “arrest në burg” për tre të akuzuarit e vrasjes së 56-vjeçarit, Anesti Rama. 26-vjeçare, Ermalinda Rama së bashku më nënën e saj, Valbona Rama dhe Çlirim Dogani kanë bashkëpunuar për vrasjen e Ramës dhe fshehjen e krimit.
Dogani dyshohet se është i dashuri i 26-vjeçares dhe ka ndihmuar nënë e bijë që të vrasin 56-vjeçarin. Sipas hetimeve të deritanishme, Anesti Rama është mbytur me tel nga e bija dhe Dogani. Bashkëshortja e viktimës, Valbona Rama ka ndihmuar ne pastrimin e gjurmëve te krimit dhe fshehjen e provave.
Emanilda Rama u arrestua më 24 korrik pasi akuzohet se ka mbytur me tel babanë e saj, 56-vjeçarin, Anesti Rama. Ngjarja ishte kallëzuar nga vajza fillimisht në polici si aksidentale, ndërsa pas veprimeve hetimore u zbulua se autorja ishte vetë ajo. Kjo e fundit më pas ka pranuar krimin dhe është shprehur se e ka vrarë sepse i ati ishte fanatik dhe nuk e linte të vishej si donte ajo apo të dilte.
Valbona Rama nëna e vajzës, u arrestua pasi akuzohet se ka pastruar trupin e viktimës, me qëllim inskenimin e vrasjes si aksidentale. Ndërkohë, Çlirim Dogani dyshohet se ka bashkëpunuar me vajzën e viktimës, duke përdorur sende të forta dhe mjete prerëse për të mbytur 56-vjeçarin.Grupi hetimor ka dyshime se vajza ka qenë në një lidhje me Doganin. Sipas raportimeve vajza ka qenë e fejuar dhe tre herë të tjera. Ngjarja dyshohet se mund te ketë ndodhur pasi babai i 26-vjeçares nuk ka pranuar lidhjen me 55-vjeçarin i cili ishtë një vit më i vogël se viktima.
