Franca do të vendosë marrëdhënie diplomatike formale me Palestinën, tha Presidenti Emmanuel Macron të enjten, në kuadër të një nisme të re në Europë për të çuar drejt fundit luftën në Gaza.
“Besnik ndaj angazhimit të saj historik për një paqe të drejtë dhe të qëndrueshme në Lindjen e Mesme, kam vendosur që Franca do të njohë Shtetin e Palestinës,” tha Macron në një deklaratë të postuar online, duke premtuar ta shpallë zyrtarisht këtë veprim në një takim të Kombeve të Bashkuara në shtator.
“Urgjenca sot është të ndalojmë luftën në Gaza dhe të ofrojmë ndihmë për popullsinë civile,” shkroi ai. “Populli francez dëshiron paqe në Lindjen e Mesme. Na takon ne, francezëve, së bashku me izraelitët, palestinezët, dhe partnerët tanë evropianë dhe ndërkombëtarë, të tregojmë se është e mundur.”
Pak pas veprimit të Macron-it, Kryeministri britanik Keir Starmer thirri një “telefonatë emergjente” me partnerët e Mbretërisë së Bashkuar të E3, Francën dhe Gjermaninë, për të premten, për të “diskutuar se çfarë mund të bëjmë me urgjencë për të ndalur vrasjet dhe për t’u dhënë njerëzve ushqimin që u nevojitet me dëshpërim.”
Në deklaratën e tij më të fortë deri më sot, Starmer gjithashtu tha se “vuajtja dhe uria që po shpalosen në Gaza janë të patregueshme dhe të pafalshme”, dhe e quajti shtetësinë “të drejtën e patjetërsueshme të popullit palestinez.”
Duke iu përgjigjur deklaratës së Macron-it, Kryeministri izraelit Benjamin Netanyahu tha: “Një shtet palestinez në këto kushte do të ishte një platformë nisjeje për të shkatërruar Izraelin, jo për të jetuar në paqe pranë tij.”
Ministri i Mbrojtjes i Izraelit, Israel Katz, tha se “shpallja e Macron-it për qëllimin për të njohur një shtet palestinez është një turp dhe dorëzim përballë terrorizmit, duke dhënë një shpërblim dhe inkurajim për vrasësit dhe përdhunuesit e Hamas-it, që kryen masakrën më të tmerrshme ndaj popullit hebre që nga Holokausti.”
Sekretari amerikan i Shtetit, Marco Rubio, tha se Uashingtoni “e refuzon fuqishëm” veprimin e Macron-it, duke e quajtur “një shuplakë në fytyrë” për viktimat e sulmit të Hamas-it më 7 tetor.
“Kjo vendimmarrje e papërgjegjshme vetëm i shërben propagandës së Hamas-it dhe e pengon paqen,” shkroi Rubio në X.
Njëmbëdhjetë nga 27 vendet anëtare të Bashkimit Europian e kanë njohur tashmë shtetin e Palestinës, përfshirë Spanjën, Rumaninë, Suedinë, Irlandën dhe Bullgarinë.
“Kundrejt vendimit të Francës për t’u bashkuar me Spanjën dhe vendet e tjera europiane në njohjen e Shtetit të Palestinës, shpreh mirëseardhjen time,” tha Kryeministri i Spanjës, Pedro Sánchez. “Së bashku, duhet të mbrojmë atë që Netanyahu po përpiqet të shkatërrojë. Zgjidhja me dy shtete është e vetmja zgjidhje.” Ministri i Jashtëm irlandez, Simon Harris, e quajti hapin e Macron “një kontribut të rëndësishëm.”
Disa liderë europianë kanë sinjalizuar një qëndrim gjithnjë e më të ashpër ndaj Izraelit javët e fundit, ndërsa numri i të vdekurve në enklavën e rrethuar ka arritur afër 60,000, sipas Ministrisë së Shëndetësisë në Gaza.
Presidentja e Komisionit Europian, Ursula von der Leyen, këtë javë e quajti të “padurueshme” dhimbjen në Gaza dhe tha se “kjo duhet të ndalet menjëherë.”
Javën e kaluar, Kryeministrja italiane Giorgia Meloni shpërtheu kundër Izraelit për një sulm ndaj një kishe katolike në Gaza që vrau tre persona. Meloni kritikoi sjelljen e Izraelit gjatë luftës në termat më të ashpër deri më tani, duke e quajtur vrasjen e civilëve “të papranueshme.” Roma ende nuk e ka njohur Palestinën.
OKB ka paralajmëruar se Izraeli po pengon hyrjen e ndihmave të mjaftueshme në Gaza, ku është raportuar për një numër gjithnjë në rritje vdekjesh nga uria. “Njerëzit në Gaza nuk janë as të gjallë dhe as të vdekur, ata janë kufoma që ecin,” tha Philippe Lazzarini, kreu i Agjencisë së Kombeve të Bashkuara për Ndihmë dhe Punë.
Megjithatë, Izraeli mohon se po organizon një bllokadë ndaj territorit të shkatërruar nga lufta. Në një intervistë për POLITICO të enjten, Ministri i Jashtëm Gideon Sa’ar këmbënguli se “problemi është që OKB nuk po shpërndan” ndihmën.
Shefja e diplomacisë së BE-së, Kaja Kallas, njoftoi një marrëveshje me Izraelin më herët këtë muaj për të lejuar më shumë kamionë ndihme të hyjnë në Gaza. Blloku po vlerëson opsionet e tij pasi ka konstatuar se Izraeli ka shkelur detyrimet për të drejtat e njeriut sipas një marrëveshjeje asociimi, dhe ministrat e jashtëm pritet të diskutojnë pasojat e mundshme gjatë një takimi muajin e ardhshëm.
Politico, përshtati në shqip ©LAPSI.AL
