Franca, Gjermania dhe Britania e Madhe, të njohura ndryshe si grupi E3, së bashku me kreun e diplomacisë së Bashkimit Evropian, i kanë bërë një paralajmërim të qartë Teheranit lidhur me programin e tij bërthamor. Gjatë një komunikimi me ministrin e Jashtëm iranian, Abbas Araghchi, përfaqësuesit e lartë evropianë, Jean-Noel Barrot, Johan Vandeful, David Lamy dhe Kaya Kallas, theksuan vendosmërinë e tyre për të aktivizuar mekanizmin e njohur si “kthimi në kohë”, në rast se nuk ka përparim në negociatat për një marrëveshje të re bërthamore.
Sipas një deklarate të lëshuar nga Ministria e Jashtme Franceze, E3 dhe BE presin që Irani të tregojë gatishmëri për të përfunduar një marrëveshje të re deri në fund të verës. Në të kundërt, ata paralajmërojnë se do të kërkojnë rivendosjen e të gjitha sanksioneve ndërkombëtare që ishin hequr në kuadër të marrëveshjes bërthamore të vitit 2015 (JCPOA).
“Mungesa e progresit do të detyrojë komunitetin ndërkombëtar të reagojë me vendosmëri,” thuhet në deklaratë. Mekanizmi i “kthimit në kohë” i lejon vendet nënshkruese të marrëveshjes bërthamore të kërkojnë rikthimin automatik të sanksioneve të Kombeve të Bashkuara nëse Irani shkel angazhimet e tij.
Ky paralajmërim vjen në një kohë tensionesh të shtuara në rajon dhe përpjekjesh të ripërtërira ndërkombëtare për të shmangur përshkallëzimin e krizës bërthamore me Iranin.
