Në GJKKO u mbajt seanca e parë në themel për dosjen Partizani. Ish-kryeministri Sali Berisha mungoi, ndërsa i pranishëm ishte dhëndri i tij Jamarbër Malltezi. Trupa gjykuese pyeti Malltezin nëse ka njoftuar Berishën, pasi OPGJ ia ka lënë atij fletëthirrjen. Malltezi u përgjigj se nuk e ka njoftuar.
Klodiana Gjyzari, avokatja e Berishës tha se koha ka qenë e shkurtër për t’u njoftuar dhe se nuk kishin dijeni nëse Berisha e dinte për seancën e sotme.
Prokurori i çështjes, Arben Kraja kërkoi shtyrjen e seancës pasi nuk është bërë njoftimi zyrtarisht sipas ligjit për Berishën, ndërsa shoqëria Homplan nuk ka asnjë përfaqësues ligjor. Ndërkohë, mungonte edhe Fatmir Bektashi për arsye shëndetësore. Trupa gjykuese vendosi shtyrjen e seancës më datë 21 korrik, ora 10:30.
