Presidenti kinez Xi Jinping tha se vendi i tij është “thellësisht i shqetësuar” nga “përshkallëzimi i papritur” i tensioneve në Lindjen e Mesme, i shkaktuar nga veprimi ushtarak i Izraelit kundër Iranit, raportoi të martën agjencia shtetërore e lajmeve e Kinës Xinhua.
Në komentin e tij të parë publik mbi konfliktin Iran-Izrael që nga shpërthimi i tij të premten, Xi tha se Kina – një mbështetëse kryesore diplomatike dhe ekonomike e Iranit – kundërshton “çdo akt që shkel sovranitetin, sigurinë dhe integritetin territorial” të vendeve të tjera.
“Konflikti ushtarak nuk është një mënyrë për të zgjidhur problemet dhe përshkallëzimi i tensioneve rajonale nuk është në interesin e përbashkët të bashkësisë ndërkombëtare”, tha Xi, duke folur së bashku me Presidentin uzbek Shavkat Mirziyoyev në Astana, kryeqytetin e Kazakistanit.
Xi ndodhet në Astana për Samitin e dytë Kinë-Azi Qendrore.
Xi tha se të gjitha palët duhet të punojnë për të qetësuar konfliktin sa më shpejt të jetë e mundur dhe se Kina është e gatshme të punojë me të gjitha palët “për të luajtur një rol konstruktiv në rivendosjen e paqes dhe stabilitetit” në rajon.
