Humb jetën në fushë futbollisti Bledar Hajdari: u godit nga infarkti gjatë ndeshjes
Një ngjarje e rëndë ka tronditur futbollin në vend. Futbollisti i FC Dajtit, Bledar Hajdari, është rrëzuar në fushën e lojës, duke humbur më pas jetën. Ndërhyrja e menjëhershme mjekësore dhe transporti për në spital nuk kanë shërbyer për ti shpëtuar jetën lojtarit. Federata e Futbollit ka shprehur tronditjen e thellë për ngjarjen tragjike të ndodhur gjatë ndeshjes së vlefshme për gjysmëfinalet e kampionatit të futbollit amator 9×9 “FSHF Sunday League Albania”, FC Dajti-FC Lumninese në Shtëpinë e Futbollit .
Gjatë ndeshjes futbollisti i FC Dajtit, Bledar Hajdari, ka shfaqur probleme shëndetësore dhe është rrëzuar në fushën e lojës. Menjëherë i është dhënë ndihma e shpejtë, duke e transportuar urgjentisht me ambulancën e pranishme në ndeshje për në spitalin e Traumës. Për fat të keq, pavarësisht asistencës mjekësore dhe të gjitha përpjekjeve për ta rikthyer në jetë, futbollisti ka ndërruar jetë.
FSHF i shpreh ngushëllimet më të thella familjes Hajdari dhe ekipit të FC Dajtit për këtë humbje të madhe që ka shokuar të gjithë komunitetin e futbollit shqiptar. Në këto momente të vështira, Federata Shqiptare e Futbollit qëndron pranë familjes, miqve dhe bashkëlojtarëve të Bledar Hajdarit, duke ndarë me ta pikëllimin për këtë ndarje të parakohshme dhe të rëndë.
