Presidenti amerikan njoftoi dje se kreu i Departamentit për Efikasitet Qeveritar, Elon Musk, do të largohet nga pozita që mban për t’iu rikthyer bizneseve që ka.
Ndonëse tha se është i kënaqur me punën e Musk, presidenti Trump tregoi se miliarderi i ‘Tesla’ nuk do të rrijë pafundësisht në qeveri.
“Elon është fantastik. Ai është patriot,” u tha Trump gazetarëve, duke shtuar se Musk mund të qëndrojë në Shtëpinë e Bardhë “për aq kohë sa të dojë” dhe se ai personalisht dëshiron që ai të qëndrojë “për aq kohë sa të jetë e mundur”.
“Më pëlqejnë njerëzit e zgjuar dhe ai është person i zgjuar. Më pëlqen edhe personalisht”, shtoi Trump, raporton Fox.
“Nuk jemi për ngut. Por do të vijë një moment në të cilin Elon do të duhet të largohet”, tha presidenti amerikan.
Punonjësit e posaçëm të qeverisë, ashtu siç është edhe Musk, lejohen të punojnë për qeverinë federale për “jo më shumë se 130 ditë në një periudhë 365-ditore”, sipas të dhënave nga Zyra e Etikës Qeveritare. Afati kohor 130-ditor i Musk, duke filluar nga Dita e Inaugurimit, do të përfundojë më 30 maj.
