Cili ka qenë shoku më i keq i skuadrës që Ronaldo “Fenomeni” ka pasur ndonjëherë në karrierën e tij? Ish-sulmuesi brazilian ndalet për një moment për të shfletuar kujtimet dhe përfundon te periudha e tij në Real Madrid. Po, aty ka pasur një lojtar që e ka zhgënjyer më shumë se të tjerët. Ai e rrëfen këtë në një intervistë me Romarion, që e ftoi në kanalin e tij tematik. Një përballje mes dy ikonave të futbollit brazilian, dy sulmuesve të jashtëzakonshëm, megjithëse me stile të ndryshme loje. Kur flasin për futboll dhe karrierën e tyre, është si të hysh në një botë ëndrrash duke menduar për talentin e tyre dhe duke dëgjuar prapaskenat e jetës së tyre sportive.
Ronaldo kaloi pesë sezone në Spanjë dhe ishte një nga protagonistët kryesorë të Real Madrid si pjesë e “galaktikëve”. Por në atë ekip me yje kishte edhe lojtarë më pak të spikatur dhe, sipas brazilianit, një nga më të dobëtit ka qenë mesfushori danez Thomas Gravesen. Stili i tij i lojës ishte i thjeshtë, i ashpër dhe plotësisht fizik, aq sa askush nuk e dëshironte pranë, nga frika se do të humbiste topin dhe ndoshta edhe kyçet e këmbëve. Ai bënte gjithçka për të ndalur kundërshtarin.
GRAVESEN, I DOBËT TEKNIKISHT
Skandinavi kompensonte kufizimet e tij teknike me forcë fizike, vendosmëri dhe një karakter luftarak. “Ishte një djalë shumë simpatik,” – thotë Ronaldo – “por duhet të them se në fushë ishte tmerrësisht i dobët.” Ai nuk e thotë këtë me qëllim fyes, por e pranon se Gravesen ishte ndër ata lojtarë që për një brazilian, i cili ishte mësuar ta trajtonte topin me butësi si një violinist, ishin shumë larg filozofisë së tij të futbollit.
Romario dëgjon, tund kokën dhe buzëqesh kur Ronaldo shprehet kështu: “Do të dish cili ka qenë lojtari më i keq që kam pasur si shok skuadre? Mirë… kanë qenë disa… por duhet të them se te Real Madrid kishte një që më dukej si një barsoletë. Ai ishte Gravesen.”
Megjithatë, ish-numri 9 i Brazilit i njeh edhe disa merita danezit, por nuk e lidh aspak me futbollin. “Disa kohë më parë ai fitoi një turne pokeri me 50 milionë dollarë ose diçka e tillë… por në futboll ishte katastrofë, luante ashpër dhe i godiste kundërshtarët si i çmendur.”
EDHE BRAZILI E KISHTE NJË TË TILLË
Por Gravesen nuk ishte i vetmi që mori një vlerësim negativ nga Fenomeni. Ai përmendi edhe dikë nga Kombëtarja braziliane, për të cilin e kishte pyetur veten: “Ky çfarë kërkon këtu?” Kush ishte ai lojtar? “Amaral ishte i dobët me topin, apo jo? Por ai vraponte pa u ndalur, fitonte topin 10 herë dhe e humbiste 9 prej tyre”.
