Jennifer Alcani ishte vetëm 13 vjeç. Mbrëmjen e së enjtes, së 9 janarit, ajo u largua nga shtëpia pa dijeninë e prindërve të saj, për të kaluar mbrëmjen në McDonald’s me dy miq më të mëdhenj. Në orën 5 të mëngjesit të së premtes, nëna, e cila nuk dinte asgjë dhe mendonte se vajza po flinte në dhomën e saj të gjumit, mori telefonatën që asnjë prind nuk do të dëshironte ta kishte, atë të policisë: “Vajza juaj është në spital pasi ka bërë aksident në Abbadia Lariana”.
Thank you for reading this post, don't forget to subscribe!“Corriere” shkruan se Jennifer ndërroi jetë më 16 janar në spitalin Manzoni në Lecco, pas 6 ditësh agonie, pa iu rikthyer asnjëherë vetëdija. Të enjten pasdite, mjekët u detyruan të hiqnin dorë. Ajo u dërgua në spital menjëherë pas përplasjes. Gjendja e saj ishte shfaqur menjëherë dëshpëruese. Gjatë gjithë javës miqtë e saj, edhe pse nuk e shihnin dot, ishin mbledhur para spitalit, nën dritaren e saj.
Miqtë e saj e thërrisnin Xheni. Babai ishte me origjinë shqiptare, por ajo jetonte në Pescarenico me nënën e saj. Mëngjesin e së premtes së 10 janarit ajo po udhëtonte me një BMW Seria 1, të drejtuar nga një mik 22-vjeçar. Makina nuk ishte e tij, por e një shoku të tij 19 vjeç nga Malgrate, i cili xhironte një video për në TikTok.
Ai nuk ishte duke drejtuar makinën sepse ende nuk ka arritur të marrë lejen e drejtimit. Ka dështuar disa herë në provim. Ata e kishin kaluar mbrëmjen së bashku dhe dy djemtë kishin pirë shumë. Në makinë u gjetën shishe me alkool.
Xheni po flinte në sediljen e pasme. Videoja më poshtë e xhiruar nga të rinjtë ka fiksuar momentet e fundit të udhëtimit të çmendur nëpër një tunel. 19-vjeçari filmon shokun e tij në timon, me muzikën në volum të lartë.
Aksidenti ndodhi pak para orës 5 të mëngjesit në hyrje të tunelit. Makina që po udhëtonte me mbi 150 kilometra në orë, humbi kontrollin kur doli nga një gjysmë kthese dhe më pas u përplas me një parapet betoni. Por teksa dy të rinjtë shpëtuan me plagë të lehta, Xheni, e cila flinte në sediljen e pasme, madje me rripin e sigurimit të vënë, nuk u zgjua më. Trauma që kishte pësuar në kokë e kaloi në koma të pakthyeshme.
Shoferi 22-vjeçar, i hetuar fillimisht për plagosje të rënda në rrugë, tashmë akuzohet për vrasje në rrugë. Për më tepër, pas përplasjes, ai dyshohet se u përpoq të ikte nga dhoma e urgjencës, pasi ishte praktikisht i padëmtuar për të shmangur testin e alkoolit. Xheni ishte regjistruar në vitin e parë të shkollës së mesme në Stoppani në Lecco. Ajo do të kishte mbushur 14 vjeç në prill. Varrimi do të bëhet të shtunën në orën 15:30 në Bazilikën e San Nicolò në Lecco. ©LAPSI.al
