Është mirë të kesh besim, por më mirë është të mos rrezikosh. Sidomos kur bëhet fjalë për teknikun Pep Guardiola, pak ditë para një sfide delikate në Champions League kundër një skuadre italiane. Gjithsesi, Manchester City mund të udhëtojë drejt Torinos për t’u përballur me Juventusin të mërkurën në Champions League me vetëm 12 lojtarë të fushës në dispozicion, përveç tre portierëve dhe disa të rinjve për të plotësuar pankinën.
Situata është e ngjashme me atë që ndodhi kundër Crystal Palace, kur, pavarësisht barazimit 2-2 dhe një ndeshjeje ku City ishte dy herë në disavantazh, Pep kishte në dispozicion vetëm Jack Grealish dhe Jeremy Doku, që të dy në gjendje jo optimale fizike. Kjo emergjencë është pjesë e një periudhe të vështirë për City-n, në atë që është konsideruar si faza më negative gjatë menaxhimit të Guardiolës, me vetëm një fitore në 9 ndeshjet e fundit në të gjitha kompeticionet.
Për këtë arsye, sezoni 2024-25, i cili duhej të ishte një vit konsolidimi për kampionët e Anglisë, është kthyer në një “sezon mbijetese”, ku pranimi i rezultateve negative dhe vazhdimi me çdo kusht është bërë i domosdoshëm. Edhe ndeshja e Champions-it në Torino hyn në këtë skenar.
LISTA E GJATË E MUNGESAVE
Problemet me dëmtimet janë përkeqësuar nga vendimi i spanjollit Guardiola për të pasur një skuadër me qëllim të reduktuar, një zgjedhje që, në një sezon veçanërisht intensiv – që pas Evropianit mund të kalojë 70 ndeshje – po shfaq kufizimet e saj. Kundër Crystal Palace, trajneri nuk mundi të llogariste në fituesin e Topit të Artë, Rodri, dhe të dëmtuarin Oscar Bobb, por mungonin gjithashtu edhe lojtari më i mirë i sezonit të kaluar në Premier League, Phil Foden, së bashku me titullarë të tjerë si Mateo Kovacic, Nathan Aké, Manuel Akanji dhe John Stones. Sipas Guardiolës, asnjëri prej tyre nuk do të jetë gati për ndeshjen kundër Juventus.
Të martën, skuadra angleze do të niset drejt Torinos pas një seance stërvitore të hapur për shtypin. Vetëm atëherë do të ketë një pamje më të qartë për gjendjen e shtatë lojtarëve, por për Akanji dhe Foden ka disa shpresa që të paktën të jenë në pankinë. Më mirë se asgjë.
