Leonardo Bonucci, në një intervistë për Prime Video, rrëfen versionin e tij mbi sherrin e ashpër me ish-teknikun Massimiliano Allegri, që ndodhi pas një Juventus-Palermo në vitin 2017. Në përfundim të atij sezoni, ish-mbrojtësi do të kalonte te Milan për një vit, përpara se të rikthehej sërish te Juventus.
“Marchisio sapo ishte rikthyer pas dëmtimit të ligamentit kryqëzor dhe në minutën e 60’ ishte i rraskapitur. I thashë: ‘Claudio, kërko të zëvendësohesh’ – shpjegoi Bonucci -. Ai nuk donte, kështu që i bëra shenjë Allegrit: ‘Ndërroje numrin 8 sepse është i mbaruar’. Pas 5 minutash, ai ndërroi Sturaron me Rincon. Unë i bëra gjeste dhe ai më dërgoi në djall: ‘Mendo të bësh futbollistin,’ më tha edhe se isha k*qe, apo diçka e ngjashme. Janë filmime për këtë”.
Çfarë ndodhi në dhomat e zhveshjes?
Pas vërshëllimës së fundit, situata shpërtheu në dhomat e zhveshjes. “Pas ndeshjes hyra brenda dhe u përballa me asistentin Landucci, që u përpoq të më ndalonte, por unë e shtyva dhe hyra me forcë në dhomën e zhveshjes – vazhdoi Bonucci. – Ne u sulëm kundër njëri-tjetrit derisa na ndanë. Pastaj i thashë: nuk e ke kuptuar çfarë doja të thoja. Ai u nxeh përsëri dhe më nxorën jashtë. Kaq ishte.”
Sherri përfundoi, por marrëdhënia e ish-kapitenit Bonucci me Juventus u dëmtua rëndë. “Ai më donte jashtë skuadre, por ndërhynë drejtuesit. Unë humba ndeshjen ndaj Portos, pastaj rifillova të luaj, por diçka tashmë ishte thyer. Në përpjekje për të ndërmjetësuar, më thanë se isha i rëndësishëm dhe se trajneri kishte kontratën në skadencë. Por para finales së Cardiffit, ata rinovuan kontratën me teknikun Allegri. Që për hir të së vërtetës ishte edhe e drejtë.”
Në fund, u përfol se “kisha bërë rrëmujë në dhomën e zhveshjes në Cardiff”. “Atëherë telefonova drejtorin dhe i thashë: ‘Jam një aset i klubit, nuk mendon se është e udhës të mohosh këtë, duke qenë se s’ka ndodhur asgjë?’ Ai më tha: ‘Nuk kemi pse themi asgjë.’ Diçka u prish dhe më 20 korrik 2017 ndodhi transferimi tronditës te Milani për 42 milionë euro: një sezon i trazuar dhe më pas rikthimi te Juventus, që ndërkohë kishte blerë edhe Cristiano Ronaldo për të synuar (pa sukses) Champions League”.
