New York Times publikon sondazhin përfundimtar, por e pranon se Trump do të nënvlerësohet prapë

Gazeta prestigjioze amerikane The New York Times në bashkëpunim me Siena College kanë sjellë sondazhet përfundimtare nga shtatë shtetet kyçe në këto palë zgjedhje.

NYT është e njohur për sondazhet e vazhdueshme që i publikon përgjatë fushatës presidenciale në SHBA. Para pak ditësh, kjo gazetë publikoi sondazhin përfundimtar të votës popullore, duke e vënë garën në barazim midis Donald Trump dhe Kamala Harris.

Por, vota popullore nuk e përcakton presidentin në SHBA. Për këtë, NYT i zhvilloi anketat matëse edhe në shtatë shtetet që po konsiderohen kyçe këtë vit: Arizona, Georgia, Michigan, North Carolina, Nevada, Pennsylvania dhe Wisconsin.

Sipas matjes përfundimtare të NYT, Kamala Harris udhëheq në Georgia (+1), në Wisconsin (+2), në Nevada (+3) dhe në North Carolina (+2).

Në anën tjetër, Donald Trump fiton vetëm në Arizona me 4% dallim, ndërsa Pennsylvania dhe Michigan janë barazim mes kandidatëve. Po të dalë i saktë ky anketim, Harris do ta fitonte garën me së paku 274 pikë elektorale.

NEW @SienaResearch / @nytimes poll:

NORTH CAROLINA
Harris 48% (+2)
Trump 46%
.
NEVADA
Harris 49% (+3)
Trump 46%
.
WISCONSIN
Harris 49% (+2)
Trump 47%
.
GEORGIA
Harris 48% (+1)
Trump 47%
.
PENNSYLVANIA
Harris 48%
Trump 48%
.
MICHIGAN
Harris 47%
Trump 47%
.
ARIZONA
Trump 49% (+4)…

— Political Polls (@Politics_Polls) November 3, 2024

Sidoqoftë, vetë New York Times e pranoi që votuesit e ish-presidentit Trump janë shumë më të tërhequr dhe më hezitues për të folur me anketues. Kështu, NYT paralajmëron se sondazhi mund të ketë gabime të mëdha sikur në dy palë zgjedhjet e fundit dhe Trump sërish të nënvlerësohet nga anketat.

Kur jemi te gabimet e NYT, në zgjedhjet e kaluara sondazhi përfundimtar i kësaj gazete e vendoste Biden përpara në Pennsylvania me 6 pikë dallim, ndërsa rezultati përfundimtar ishte Biden +1,2 pikë. Në North Carolina, NYT parashikonte fitore me 3 pikë dallim për Biden, ndërsa Trump fitoi aty me 1,5 pikë. Gabime pati edhe në shtetet tjera.

Siç mund të vërehet, ish-presidenti Trump historikisht nënvlerësohet nga sondazhet, duke shkaktuar befasi kur performon mirë në rezultatet përfundimtare në shtetet me rëndësi. Mbetet të shihet nëse kjo tendencë do të përsëritet edhe nesër.