“Na vjen keq, se për pak sekonda po fitonim. Në 30 minutat e para kemi gabuar shumë, nuk kemi qenë skuadra që kemi qenë në stërvitje e që duam të jemi, që kemi qenë në shumicën e kohës deri tani”. Bledi Shkëmbi nuk e fsheh mërzinë që i shpëtoi nga duart fitorja e parë në kampionat pikërisht në minutën e pestë shtesë. Për Tiranan katër barazime në katër” “E vërtetë, kemi pësuar gola naivë, sidomos me Egnatian por edhe sot. Sidomos dy golat sot ishin shumë naivë. Ndoshta ka të bëjë eksperienca në ato momente, sidomos në sekondat e fundit”.
Shkëmbi e gjen alibinë, duke iu referuar golit të shënuar nga Ruçi, që gjeti të pavendosur mirë një skuadër që duhet të menaxhonte fitoren vetëm për pak minuta: “Është edhe eksperienca. Unë nuk justifikohem por ka në fushë vetëm 3 lojtarë që kanë luajtur në Superiore. Patjetër do të na duhet pak kohë për të qenë më kompakt e për të patur pak më shumë eksperiencë”.
Shkëmbi pastaj sqaroi edhe situatën me Haxhiun: “Asnjë problem, ka qenë vendim taktik, por Abel ka bërë dy ndeshjet e para goxha te mirë, ka dhënë pritshmëritë e tij. Unë e njoh Haxhiun shumë mirë që te Dinamo, ai na jep diçka me tepër nga lojtarët e tjerë. Por atij i kërkoj më shumë, nuk duhet të jetë fragmentar gjatë lojës. Nëse ai e Ndreca vazhdojnë kështu, ne dimë që mund të bëjnë ndryshimin”, e mbylli Shkëmbi.
