“Të gjithë trajnerët e përgatitin ndeshjen për të fituar, edhe ne. Unë mendoj se nesër do të jetë një ndeshje shumë e bukur dhe stadiumi “Air Albania” do të jetë i mbushur plot. Gjeorgjia është një ekip i fortë, i organizuar, i vështirë. Do të duhet të ecim me 100 në orë nëse duam të bëjmë një paraqitje të bukur, do të jetë e rëndësishme”. Sylvinho është gati për sfidën e re kundër Gjeorgjisë, përpara publikut të shtëpisë ku braziliani dhe kuqezinjtë nuk lejojnë gol prej gati dy vjetësh. Suksesi me Ukrainën e ka rritur moralin e kuqezinjve, por përballë do të jetë një skuadër që vjen nga dominimi 4-1 ndaj çekëve.
Si e tillë ndeshja ka peshë dhe duhet një ekip me energji të plota, gjë që e bën brazilianin Sylvinho të mos zbilancohet në lidhje me formacionin: “Duhet të shohim lojtarët. Koha është e shkurtër për të gjithë, kthehen nga transferta, dje kemi vetëm një seancë të shkurtër stërvitore në Pragë. Sot duhet parë se si janë lojtarët. Duhet folur, duhet parë stërvitja, por kemi 24 lojtarë dhe shumë të gatshëm për të shkuar në fushë. Nëse kuptojmë që një lojtar nuk është në 100%, e bëjmë ndryshimin, sot është ende herët, duhet të zhvillojmë gjërat dhe të marrim një vendim nesër në darke”.
FILOZOFIA E KLOPP
E qartë se konsumi i energjive të kuqezinjve ka qenë më i madh se i kundërshtarëve të tyre, por për teknikun Sylvinho nuk duket një problem. Të paktën jo nëse aplikohet një filozofi e Jurgen Klopp: “Lojtarët e dinë që duhet të futen në fushë me shumë intensitet. Futbolli të konsumon energji. Dua të rikujtoj një shprehje të Klop: Nëse nuk bën gabime, nuk ke nevojë të kthehesh të mbrosh”.
ANTI-KVARA
Masat për Khvicha Kvaratskhelia nuk janë si për të tjetër, edhe pse Gjeorgjia nuk është vetëm sulmuesi i Napolit: “Bëhet fjalë për një lojtar shumë të madh, i fortë fizikisht, teknikisht i fortë. Çdo gjë që bën në fushë është e nivelit të lartë. Por përtej tij, kanë 4-5 lojtarë të shkëlqyer, nuk u them emrat se e kam të vështirë, por janë lojtarë që i shoh prej një muaji”.
