Disa persona kanë shtënë me armë zjarri ndaj policisë kufitare të shtunën pasdite në qytetin verior të Kosovës, Zubin Potok dhe si pasojë njëri nga të dyshuarit, serb i Kosovës, është arrestuar, njoftoi policia e Kosovës.
Policia tha se nuk ka të lënduar nga shkëmbimi i zjarrit mes të dyshuarve dhe oficerëve policorë në fshatin Bube të Zubin Potokut, komunë e banuar me shumicë serbe, në veri të Kosovës. Të dyshuarit, sipas njoftimit, i shpërfillën urdhrat e policisë për t’u ndalur për kontroll dhe gjuajtën me armë zjarri ndaj oficerëve.
“Në përpjekje për t’i ndaluar dhe kontrolluar automjetet e dyshuara, policia ka hasur në rezistencë të armatosur nga persona të dyshuar. Të ndodhur në një situatë të tillë, për të mbrojtur veten dhe vënë situatën nën kontroll, zyrtarët policorë i janë kundërpërgjigjur sulmit po ashtu me armë”, njoftoi policia e Kosovës. Policia e identifikoi të dyshuarit të cilët dyshohet se po kontrabandonin dele nga Serbia në Kosovë.
“Gjatë kontrollit të kamionit, janë gjetur të ngarkuara 40 dele, pa dokumentacion përcjellës e që dyshohet se janë kontrabanduar nga Serbia për në republikën e Kosovës. Po ashtu aty janë hasur edhe dy automjete të braktisura, dyshohet se kanë qenë në përcjellje të kamionit”, tha policia.
Në vendin e ngjarjes kanë dalë njësitet përkatëse policore, përfshirë inspektoratin policor të Kosovës dhe për rastin është njoftuar prokurori, thuhet në njoftim. Sipas Radio Evropa e Lirë, i dyshuari, 42 vjeç, është dërguar në paraburgim ku do të mbahet për 48 orë dhe përballet tani me akuza për sulm ndaj personit zyrtar e për kontrabandë me mallra.
“Kamioni me dele është dërguar në terminalin doganor, dy veturat e hasura në vend-ngjarje janë konfiskuar, kurse më aktvendim nga prokurori, i dyshuari dërgohet në mbajtje deri në 48 orë”, tha policia.
