Autoritetet ukrainase kanë thënë se Rusia ka goditur infrastrukturën portuale në rajonin Odesa të Ukrainës jugperëndimore gjatë natës me një sulm me raketa, duke vrarë një roje sigurie dhe duke shkatërruar një terminal mallrash.
Portet e Odesës kanë qenë objektiva të rregullta të sulmeve ruse që kur Moska javën e kaluar u tërhoq nga marrëveshja e grurit të Detit të Zi, e ndërmjetësuar nga Turqia dhe OKB-ja që lejoi eksportimin e grurit ukrainas nga portet e Odesës për gati një vit.
Guvernatori i Odesa-s, Oleh Kiper tha se Rusia hodhi raketa Kalibr në një nga portet e qytetit nga një nëndetëse në Detin e Zi. Ai tha se një ndërtesë e sigurisë është shkatërruar dhe dy makina janë dëmtuar.
Forca ajrore e Ukrainës tha se nuk ishte në gjendje të rrëzonte raketat Kalibr, megjithëse tha se rrëzoi tetë dronë gjatë natës në pjesë të tjera të Ukrainës.
Natalya Khomenyuk, një zëdhënëse e komandës ushtarake jugore të Ukrainës, tha se një stuhi gjatë natës të mërkurën ndihmoi Rusinë në sulmin e saj në Odesa.
