Theo Hernandez ka publikuar një foto me një fanellë të dedikuar Paolo Maldinit: një tjetër goditje ndaj Milanit pas mesazhit të lamtumirës për klubin kuqezi para kalimit te Al-Hilal. Mbrojtësi i majtë francez është ende me pushime pasi ka firmosur me klubin arab dhe ka postuar një foto në profilin e tij në Instagram ku mban veshur një fanellë të dedikuar ish-kapitenit dhe ish-drejtuesit të Djallit.
Në fanellë ka disa imazhe të Maldinit në aksion dhe një mbishkrim të madh ‘Capitano’ poshtë: kjo ndarje e futbollistit francez u interpretua si goditja e radhës ndaj drejtuesve aktualë të Milanit, që ai i kishte sulmuar edhe në momentin e përshëndetjes.
Pas zyrtarizimit të shitjes te klubi arab i drejtuar nga Simone Inzaghi, Theo Hernandez kishte shkruar në profilin e tij në Instagram fjalë shumë të forta kundër drejtuesve të AC Milan: “Drejtimi që ka marrë klubi dhe disa vendime të fundit nuk pasqyrojnë vlerat dhe as ambicien që më sollën këtu. Është momenti të mbyll një kapitull dhe të nis një tjetër, ndryshe, por po aq i rëndësishëm për mua”.
Theo Hernandez nuk e ka fshehur kurrë admirimin për Maldinin
Theo u bind pikërisht nga Maldini të transferohej në Milano dhe kaloi gjashtë sezone te kuqezinjtë, me 262 paraqitje të shoqëruara me 34 gola dhe 45 asist dhe me një titull kampion e një Superkupë të Italisë në palmares.
Futbollisti francez ka përshëndetur Milanellon duke thënë fjalë të ëmbla për shokët e skuadrës, tifozët dhe veçanërisht për Paolo Maldinin, duke e falënderuar për “afërsinë, vizionin dhe udhëheqësinë”, por ka hedhur një sulm të drejtpërdrejtë ndaj drejtuesve të rinj: “Vendimi im për t’u larguar nuk ka qenë i lehtë. Gjithmonë kam ditur ku kam dashur të jem, dhe Milani ka qenë gjithmonë prioriteti im. Por, për fat të keq, jo gjithçka varet nga një person i vetëm. Drejtimi që ka marrë klubi dhe disa vendime të fundit nuk pasqyrojnë vlerat dhe as ambicien që më sollën këtu. Është momenti të mbyll një kapitull dhe të nis një tjetër, ndryshe, por po aq i rëndësishëm për mua”.
