Frenkie de Jong i neveritur dhe i zhgënjyer nga Barcelona. Mesfushori thuhet se ka marrë një telefonatë nga tekniku Xavi që konfirmonte vendimin e klubit për ta shitur atë te Manchester United. Holandezi nuk e ka pritur mirë lajmin. Ish-mesfushori i Ajax është rikthyer në stërvitje me blaugranat të hënën, në kohën kur zyrtarët e Red Devils, Richard Arnold dhe John Murtough fluturuan në Barcelonë për të finalizuar një marrëveshje midis palëve. Të dy u takuan me presidentin e Barcelonës, Joan Laporta dhe përgjegjësit për merkaton të klubit, Mateu Alemany, Jordi Cruyff dhe Rafa Yuste.

United dhe Barcelona, sipas Mundo Deportivo, tashmë janë takuar dy herë në më pak se një javë. Klubi anglez thuhet se ka bërë një ofertë prej rreth 65 milionë euro për spanjollët. Por tani, sipas rrjetit televiziv katalanas TV3, flitet për një paketë me vlerë rreth 85 milionë euro. Pas takimit gjatë orëve të fundit, Xavi telefonoi de Jong për ta informuar atë për situatën. 25-vjeçari nuk e ka marrë mirë këtë gjë. Mesfushori është i vetëdijshëm për situatën ekonomike të Barcelonës dhe nevojën e tyre të dëshpëruar për të shitur lojtarë, por ishte i zhgënjyer me mënyrën se si klubi e trajtoi të gjithë situatën.

Saga e De Jong-United ka vazhduar për një kohë të gjatë, por lojtari nuk e kishte menduar se do të përfundonte kështu. Holandezi ka qenë gjithmonë mirënjohës për interesimin e fortë të shfaqura nga Djajtë e Kuq dhe në veçanti nga Erik ten Hag, i cili e telefonoi disa herë, por mendonte dhe shpresonte të qëndronte në Spanjë. Presidenti i Barcelonës Laporta tha javën e kaluar se de Jong “nuk ishte në shitje”, por disa media raportuan se ishte thjesht një taktikë negociuese. E tani, duket se United më në fund po arrin të mbyllë marrëveshjen, pavarësisht se planet dhe dëshirat e lojtarit ishin të tjera.