Grupi Parlamentar i Partisë Demokratike do të padisë sot në Gjykatën Kushtetuese Bordin e Transparencës për çmimet. Mësohet se padia do të depozitohet në mesditë në GJK nga deputetët Dhurata Çupi dhe Arbi Agalliu.

Një ditë më parë, kreu i grupit, Enkelejd Alibeaj e cilësoi antikushtetues bordin që vendos për çmimet e naftës, benzinës dhe gazit.

“Shqipëria mbetet në krye të listës së vendeve me çmimin më të lartë të hidrokarbureve. Kjo jo vetëm për shkak të nivelit të lartë të taksave, mungesës së reagimit nga Qeveria, por edhe për faktin se Shqipëria është nga të vetmet vende ku çmimi i naftës, benzinës apo gazit, paracaktohet nga Klubi i Oligarkëve, që qeveria e ka emërtuar si Bordin e kontrollit të çmimeve.

Gjatë gjithë këtyre muajve, Klubi i Oligarkëve jo vetëm nuk ka mbajtur nën kontroll çmimet e naftës, benzinës apo gazit, por ka shërbyer si një mekanizëm korruptv për të deformuar tregun në dëm të interesit të qytetarëve. Për këtë arsye, dua të informoj opinionin publik se Grupi Parlamentar i Partisë Demokratike, ka përgatitur dhe ditën e nesërme do të depozitojë në Gjykatën Kushtetuese, kërkesën për shfuqizimin si antikushtetues të dy ligjeve mbi bazën e të cilave funksionon Bordi i paracaktimit të çmimit të naftës, benzinës dhe gazit.” tha Alibeaj dje në një konferencë me mediat.