KQZ3-655x356
Komisioni Qendror i Zgjedhjeve do të zëvendësojë sot 8 vendet në parlament që do të lihen bosh nga deputetët që kanë vendosur të garojnë për kryetar bashkie.

Mbledhja do të zhvillohet në 18:00 dhe pritet të shqyrtohen 35 projektvendime.

Në mbledhjen e sotme, KQZ do të caktojë dhe vendnumërimin e votave për 24 Zona Administrimi Zgjedhor, ndërsa pritet të regjistrohen dhe 16 kandidatë për kryetar Bashkie për zgjedhjet e 21 qershorit.

Deputetët që lënë mandatin dhe kush i zëvendëson

4 deputetë janë në kampin e majtë dhe 4 në kampin e djathtë. Në kampin e mazhorancës , largohet si deputet për të garuar në 21 qershor në Fier, Armando Subashi i cili do të zëvendësohët nga Bujar Cela.

Ikën Majlinda Bufi dhe zëvendësohet nga Antoneta Dhima.

Kandidati i Krujës, Artur Bushi zëvendësohet nga Shkëlqim Troplini, ndërsa Miranda Rira e Lëvizjes Socialiste për integrim do të zevendësohet nga Edilira Cerkezi.

Ndërkohë nga PD Ardian Turku është dorëhequr si deputet për të garuar në Elbasan duke i lënë rrugën e hapur Arbiola Halimit për në parlament.
Besnik Dushaj, do të kandidojë në Tropojë ndërkohë që mandatin e tij e merr Mimoza Hajdarmataj.

Irma Kopliku do të jetë deputetja e re e qarkut Shkodrës e cila merr mandatin e Voltana Ademit, ndërkohë pas dorëheqjes së Halim Kosovës, për të garuar për Bashkinë e Tiranës në parlament vjen Asllan Dogjani.

Nga tetë deputetët e rinj që hyjnë në kuvend pesë prej tyre jane femra. Në total numri i femrave në kuvendin e Shqipërisë shkon në 31 duke çuar në 22 përqind prezencën femërore në parlament.